Rohit Sharma Big Statement On Retirement ODI World Cup 2027 Plans : टीम इंडियाचा माजी कर्णधार आणि अनुभवी खेळाडू रोहित शर्माने (Rohit Sharma) वेस्ट इंडिजविरुद्धच्या एकदिवसीय मालिकेपूर्वी आपल्या निवृत्तीच्या चर्चांना पूर्णविराम दिला आहे. बीसीसीआयच्या भविष्यातील योजनांमध्ये रोहित नसल्याच्या वावड्या अलीकडे उठल्या होत्या; मात्र बीसीसीआयने त्याचे आधीच खंडन केले होते. आता स्वतः रोहित शर्माने २०२७ च्या एकदिवसीय विश्वचषकाबाबत (ODI World Cup 2027) आपली भूमिका उघड करत, मैदानातून इतक्यात पायउतार होण्याचा कोणताही विचार नसल्याचे स्पष्ट शब्दांत ठणकावून सांगितले आहे.

‘मिळवायचे ते मिळाले हा विचार मनात येत नाही’; रोहितचा थेट निर्धार!

३९ वर्षीय रोहित शर्मा म्हणाला, “माझ्या मनात कधीच असा विचार येत नाही की, जे काही मिळवायचे होते ते मिळवून झाले आहे. जोपर्यंत तुम्ही खेळत आहात, तोपर्यंत भविष्यात साध्य करण्यासाठी नेहमीच नवे लक्ष्य असते. मी आगामी विश्वचषकाकडे आणि त्यातील संधींकडे अत्यंत सकारात्मकतेने पाहत आहे.” जागतिक स्तरावर विविध प्रतिस्पर्धी आणि भिन्न मैदानांवर स्वतःला सिद्ध करणे हेच खेळाडूसाठी खरे आव्हान असते, असेही त्याने नमूद केले.

लॉर्ड्सवरील शतकी तडाखा; टीकाकारांची केली होती बोलती बंद!

🚨 ROHIT SHARMA STATEMENT ON ODI WORLD CUP 27 🚨

– “The thought will never cross my mind that the business I had is finished. As long as you’re playing, there is always something to look forward to and I’m looking forward to the World Cup, looking at what lies ahead for me.… pic.twitter.com/oqTWpjpsai

— VIKAS (@Vikas662005) September 26, 2026

रोहितने इंग्लंडविरुद्धच्या मागील एकदिवसीय मालिकेत दमदार कामगिरी केली होती. क्रिकेटची पंढरी मानल्या जाणाऱ्या लॉर्ड्स मैदानावरील अखेरच्या वनडेत झंझावाती शतक झळकावून त्याने आपल्यातील क्षमतेची प्रचिती दिली होती. आता वेस्ट इंडिजविरुद्धच्या तीन सामन्यांच्या मालिकेतही तीच लय कायम राखून आगामी महत्त्वाच्या दौऱ्यांसाठी संघात आपले स्थान अभेद्य ठेवण्याचा ‘हिटमॅन’चा मानस आहे.

हेही वाचा – Joshna Velavan Bronze : विजयाचा जल्लोष अंगाशी आला अन् हातातून सुवर्ण निसटले! जोशना-वेलवन जोडीला कांस्यवर मानावे लागले समाधान

२०२७ चा विश्वचषक अन् वयाचे आव्हान; मोजक्या सामन्यांत फॉर्म राखण्याची कसोटी!

दक्षिण आफ्रिका, झिम्बाब्वे आणि नामिबिया यांच्या संयुक्त यजमानपदाखाली ४ ऑक्टोबर ते २१ नोव्हेंबर २०२७ दरम्यान होणाऱ्या विश्वचषकावेळी रोहित ४० वर्षांचा असेल. कसोटी व टी-२० मधून निवृत्त झाल्याने तो केवळ वनडे खेळत आहे. विश्वचषकापूर्वी भारताचे मोजकेच वनडे सामने असल्याने मॅच प्रॅक्टिस आणि फिटनेस टिकवून ठेवण्याचे मोठे आव्हान रोहितसमोर असेल.