मुंबई : उपमुख्यमंत्री देवेंद्र फडणवीस यांनी ‘जेव्हा मी सांगतो की मी पुन्हा येईन, तेव्हा मी नक्की येतो आणि मी कसा येतो, हे सर्वांनाच माहिती आहे ‘, असे विधान केले होते. त्यांच्या या विधानावर आता संपूर्ण राजकीय वर्तुळातून प्रतिक्रिया उमटत आहेत. दरम्यान, राष्ट्रवादी काँग्रेसचे आमदार रोहित पवार यांनी या विधानावरून फडणवीसांवर खोचक शब्दात टीका केली आहे.

देवेंद्र फडणवीसांच्या विधानावर प्रतिक्रिया देताना रोहित पवार यांनी,“देवेंद्र फडणवीसांच्या ‘मी पुन्हा येईन’ या विधानाची आम्हाला कोणतीही भीती नाही. याची भीती खरं तर मुख्यमंत्री एकनाथ शिंदे यांच्या वाटायला हवी. देवेंद्र फडणवीस पुन्हा येईन म्हणतात, पण ते कोणत्या पदावर येतील, याचं उत्तर एकनाथ शिंदे यांनी द्यावं, अशी खोचक टीका रोहित पवार यांनी केली.

मुळात त्यांचं हे विधान आमच्यासाठी नव्हतं, तर एकनाथ शिंदे यांच्यासाठी होतं”, असा टोलाही त्यांनी लगावला. दरम्यान, उपमुख्यमंत्री देवेंद्र फडणवीस यांनी गुरुवारी कोल्हापूरच्या चंदगडमध्ये भगवान श्री नृसिंह मंदिरात जाऊन दर्शन घेतलं. यावेळी उपस्थितांशी संवाद साधताना त्यांनी ‘मी पुन्हा येईन’, असे विधान केले होते.

यावेळी बोलताना फडणवीस यांनी, “पाटीलसाहेब, तुम्हाला एवढंच सांगतो की इथे एकदा येऊन मन भरत नाही. त्यामुळे मी पुन्हा येणार आहे. तुम्हाला माहितीये की जेव्हा मी सांगतो मी पुन्हा येईन, तेव्हा मी नक्की येतो. कसा येतो हेही तुम्हाला माहिती आहे. आपलं कुलदैवतच नरसिंग आहे. आपण कुठूनही प्रगती करतो”, असे ते म्हणाले होते.