पिंपरी (प्रतिनिधी) – शस्त्रक्रियेची अचूकता आणि रुग्णांची सर्वाधिक काळजी घेण्यासाठी भोसरी येथील मेडीकव्हर हॉस्पिटलने गुडघा प्रत्यारोपणासाठी रोबोटिक शस्त्रक्रिया सुरू केल्या आहेत. हा अभिनव दृष्टीकोन ऑर्थोपेडिक शस्त्रक्रियेच्या क्षेत्रात एक महत्त्वपूर्ण पाऊल आहे.

सुधारित व अचूक परिणाम आणि रुग्णांना लवकर बरे होण्याची वेळ या दोन्ही गोष्टी यातून साध्य करण्याचे प्रयत्न मेडिकव्हर हॉस्पिटल तर्फे करण्यात येणार असल्‍याची माहिती रोबोटिक जॉइंट रिप्लेसमेंट आर्थ्रोस्कोपी आणि स्पोर्ट्स मेडिसिन सर्जन विभागाचे ऑर्थोपेडिक सल्‍लागार डॉ. राहुल डी गागरे यांनी दिली.

डाॅ. गागरे म्‍हणाले की, रुग्णालयाच्‍या वतीने या बाबत अधिक माहिती दिली की, रोबोटिक सहाय्यक शस्त्रक्रिया ही शल्यचिकित्सकांना कठिण असणारी शस्त्रक्रिया देखील करण्याची क्षमता प्राप्‍त करून देते. त्‍यामध्ये अचूकता असते. ओपन सर्जरीसारख्या पारंपारिक तंत्रांमध्ये रोबोटिक हस्तक्षेप अधिक लवचिकता आणि नियंत्रण देते.

रोबोटिक सहाय्यक शस्त्रक्रिया गुडघा प्रत्यारोपणासाठी अतुलनीय अचूक आणि वैयक्तिक सहायता प्रदान करते. कौशल्यासह तंत्रज्ञानाची जोड दिल्याने शस्त्रक्रियेत गुंतागुंत कमी होते व आम्हाला योग्य तो परिणाम अचूक मिळतो.

अशी होणार शस्त्रक्रिया –

रोबोटिक सर्जिकल सिस्टीम ची प्रक्रिया कृत्रिम बुद्धिमत्ता, संवर्धित वास्तव आणि सर्जनचे कौशल्य हे एकत्रितपणे परिपूर्ण परिणाम साध्य करण्यास कार्य करतात. शल्यचिकित्सक प्री-ऑपरेटिव्ह सीटी स्कॅनसह गुडघ्याच्या अद्वितीय शरीर रचनाचे 3D प्रतिनिधित्व तयार करतो.

प्रत्यारोपणाचा योग्य आकार आणि स्थिती निर्धारित करण्यासाठी सर्जन या माहितीचा आधार घेऊन शस्त्रक्रिया योजना तयार करतो. रोबोटिक प्रणाली ही प्रक्रिया स्वतः करत नाही, परंतु तिच्याकडे एक रोबोटिक हात आहे जो सर्जनद्वारे नियंत्रित केला जातो आणि तो शस्त्रक्रियेच्या यशस्वीतेसाठी आवश्यक ती माहिती सर्जनला पोहचवतो.