शिरूर: शिरूर पोलीस स्टेशन अंतर्गत 5 एप्रिल रोजी नोंदवण्यात आलेल्या जबरी चोरीच्या गुन्ह्याचा स्थानिक गुन्हे शाखेने पर्दाफाश केला आहे. दोन आरोपींना अटक करत पोलिसांनी 35,000 रुपये किमतीचा चोरीचा मुद्देमाल जप्त केला आहे.

फिर्यादीला कामाचे आमिष दाखवून दोन अज्ञात आरोपींनी त्याच्याच टीव्हीएस ज्युपिटर दुचाकीवर बसून जात होते. काही अंतरावर कच्च्या रस्त्यावर लघूशंकेसाठी गाडी थांबवण्याचा बहाणा करत, आरोपींनी फिर्यादीला मारहाण करून गाडीवरून ढकलले आणि दुचाकी व मोबाईल घेऊन पळ काढला.

स्थानिक गुन्हे शाखेने तांत्रिक विश्लेषण आणि गोपनीय माहितीच्या आधारे मुख्य आरोपी मारुती मसाराव मस्के (वय 23, रा. कुंभारी, ता. पुसद, जि. यवतमाळ) आणि त्याच्या विधीसंघर्षित भावाला अटक केली. चोरीचा मोबाईल, दुचाकी जप्त करून आरोपींना शिरूर पोलिसांच्या ताब्यात देण्यात आले आहे.

ही कारवाई पोलीस अधीक्षक पंकज देशमुख, अतिरिक्त पोलीस अधीक्षक रमेश चोपडे आणि उपाधीक्षक प्रशांत ढोले यांच्या मार्गदर्शनाखाली पोलीस निरीक्षक अविनाश शिळीमकर, तुषार पंदारे, जनार्धन शेळके, संजू जाधव आणि राजू मोमीन यांच्या पथकाने यशस्वीपणे पार पाडली. या तात्काळ कारवाईमुळे परिसरात नागरिकांमध्ये विश्वास वाढला आहे. आरोपींना न्यायालयात हजर करण्यात आले असून, पुढील तपास सुरू आहे.