हैदराबाद: तेलंगणा सरकारने राज्याची ‘इनोव्हेशन इमेज’ अधिक मजबूत करण्यासाठी आणि जागतिक कंपन्यांशी असलेले संबंध दृढ करण्यासाठी एक महत्त्वपूर्ण आणि अनोखा निर्णय घेतला आहे. हैदराबाद शहरातील काही महत्त्वाच्या रस्त्यांची नावे आता अमेरिकेचे राष्ट्राध्यक्ष डोनाल्ड ट्रम्प, उद्योगपती रतन टाटा आणि गूगल, मायक्रोसॉफ्ट, विप्रो यांसारख्या जागतिक कंपन्यांच्या नावावर ठेवण्याचा प्रस्ताव आहे. मुख्यमंत्री कार्यालयाच्या माहितीनुसार, अमेरिकेच्या वाणिज्य दूतावासाजवळच्या रस्त्याला ‘डोनाल्ड ट्रम्प अव्हेन्यू’ असे नाव देण्याचा प्रस्ताव मुख्यमंत्री रेवंत रेड्डी यांनी ठेवला आहे. नेहरू आऊटर रिंग रोडला (ORR) रॅडियल रिंग रोडशी जोडणाऱ्या १०० मीटर लांबीच्या नव्या ग्रीनफिल्ड रोडला ‘रतन टाटा मार्ग’ असे नाव देण्यात येणार आहे. या रस्त्याच्या इंटरचेंजला आधीच ‘टाटा इंटरचेंज’ असे नाव देण्यात आले आहे. जगातील तंत्रज्ञान क्षेत्रातील योगदानाबद्दल एका महत्त्वाच्या रस्त्याचे नामकरण ‘गूगल स्ट्रीट’ असे केले जाणार आहे. हे नामकरण अमेरिकेबाहेरील गूगलच्या सर्वात मोठ्या कॅम्पसजवळ होणार आहे. तसेच, एका रस्त्याला ‘मायक्रोसॉफ्ट रोड’ आणि एका महत्त्वाच्या चौकाला ‘विप्रो जंक्शन’ असे नाव देण्याचा विचार आहे. हा निर्णय जानेवारीमध्ये होणाऱ्या ‘तेलंगणा रायझिंग ग्लोबल समिट’ (Telangana Rising Global Summit) पूर्वी जागतिक लक्ष वेधून घेण्याच्या धोरणाचा भाग असल्याचे मानले जात आहे. सरकारचा उद्देश: आंतरराष्ट्रीय व्यापार केंद्र म्हणून ओळख – तेलंगणा सरकारचा दावा आहे की, जगाला मोठे योगदान देणाऱ्या व्यक्ती आणि कंपन्यांच्या नावावरून रस्त्यांना नावे देणे हे त्यांच्या सन्मानाचे प्रतीक आहे. मुख्यमंत्री रेवंत रेड्डी म्हणाले, “यामुळे दोन फायदे होतील – एकतर या दिग्गजांना खरी श्रद्धांजली मिळेल, आणि दुसरे म्हणजे, हैदराबादचा ‘ब्रांड’ जगात अधिक चमकेल.” या पुढाकारामुळे हैदराबादला आंतरराष्ट्रीय व्यापार केंद्र म्हणून स्थापित करण्यास मदत मिळेल. भाजपचा नामकरणावर आक्षेप – दरम्यान, तेलंगणा सरकारच्या या निर्णयावर भाजपने तीव्र विरोध दर्शवला आहे. केंद्रीय मंत्री आणि भाजप नेते बंडी संजय कुमार यांनी काँग्रेस सरकारवर निशाणा साधला. त्यांनी ‘X’ वर पोस्ट करत म्हटले की, रेवंत रेड्डी ‘जे ट्रेंडिंगमध्ये असते’, त्यानुसार जागांची नावे बदलतात. त्यांनी मागणी केली आहे की, जर काँग्रेस सरकारला नामकरण करण्याची इतकीच आवड असेल, तर त्यांनी आधी हैदराबादचे नाव बदलून ‘भाग्यनगर’ करावे.
