पिंपरी, (प्रतिनिधी) – वल्लभनगर एसटी स्थानकाच्या काँक्रिटीकरणाचे काम पूर्ण झाल्यानंतर फलाट व स्थानकादरम्यान मोठ्या सिमेंट ब्लॉक बसविण्याच्या कामाकरिता केलेल्या खोदकामाचा राडारोडा फलाटानजीक ठेवण्यात आला आहे. या स्थानकातून प्रवास करणार्‍या प्रवाशांना या राडारोड्याचा फटका बसत आहे. ऐन गर्दीच्या हंगामात राडारोडा प्रवाशांच्या बस पकडण्याच्या धावपळीत अडथळा ठरत असल्याचे चित्र आहे.

मुलांच्या शाळांना उन्हाळ्याची सुट्टी लागली असून, लोकसभा निवडणूक संपल्यानंतर गावी जाणार्‍या प्रवाशांच्या संख्येत मोठी वाढ झाली आहे. पिंपरी-चिंचवड शहरातील वल्लभनगर एसटी स्थानकावरून राज्यभरात विविध ठिकाणी बस सोडल्या जात असल्याने याठिकाणी प्रवाशांची मोठी गर्दी पहायला मिळत आहे. तर मेट्रोला जागा उपलब्ध करून देण्याच्या बदल्यात एसटी स्थानकाचे काँक्रिटीकरण करुन दिले जात आहे.

काही महिन्यांपुर्वी या स्थानकाचे निम्मे काँक्रिटीकरणाचे काम झाले होते. उर्वरित निम्मे काम बाकी राहिल्याने एसटी बसच्या संचालनात अडथळा निर्माण होत असायचा. आता हे काम पूर्ण करण्यात आले आहे.

मात्र, बसस्थानकातील फलाटावर बस उभय केल्या जाणार्‍याठिकाणी सिमेंटचे ब्लॉक बसविण्याचे काम हाती घेतले आहे. त्याकरिता काँक्रिटीकरणाचा काही भाग खोदण्यात आला आहे. हा राडारोडा फलाटाजवळच टाकण्यात आला आहे. त्यामुळे ऐन गर्दीच्यावेळी बस पकडण्यात प्रवाशांना याचा अडथळा होत असल्याचे चित्र आहे. याबाबत सहाय्यक आगारप्रमुख गणेश रत्नपारखी यांच्याशी संपर्क न होऊ शकल्याने त्यांची प्रतिक्रिया समजू शकली नाही.