Accident News : जळगाव जिल्ह्यातील भुसावळ तालुक्यात भीषण रस्ते अपघातात चौघांचा मृत्यू झाल्याने हळहळ व्यक्त केली जात आहे. वरणगाव हद्दीतील महामार्गावर भरधाव कार आणि दुचाकीमध्ये समोरासमोर धडक होऊन ही दुर्घटना घडली. या अपघातात एकाचा जागीच मृत्यू झाला, तर गंभीर जखमी झालेल्या तिघांनी उपचारादरम्यान प्राण गमावले. (Accident News)

मिळालेल्या माहितीनुसार, वरणगाव परिसरातील हिरा मारुती मंदिराजवळ हा भीषण अपघात झाला. मुक्ताईनगरच्या दिशेने जाणाऱ्या दुचाकीला विरुद्ध दिशेने भरधाव वेगात येणाऱ्या कारने जोरदार धडक दिली. धडक इतकी भीषण होती की दुचाकी चालक विजय शंकर काळे यांचा घटनास्थळीच मृत्यू झाला. (Accident News)

या अपघातात दुचाकीवरील अन्य प्रवासी ऐश्वर्या बहादूर भोसले (50), विघ्नेश शंकर चव्हाण (14) आणि एक वर्षांची मोनालीसा शंकर चव्हाण हे गंभीर जखमी झाले होते. जखमींना तातडीने जळगाव जिल्हा शासकीय वैद्यकीय महाविद्यालयात दाखल करण्यात आले. मात्र उपचारादरम्यान तिघांचाही मृत्यू झाला. (Accident News)

या दुर्दैवी घटनेमुळे एकाच कुटुंबावर दुःखाचा डोंगर कोसळला असून परिसरात शोककळा पसरली आहे. मृतांच्या पार्थिवांचे शवविच्छेदनासाठी रुग्णालयात पाठवण्यात आले आहे. (Accident News)

दरम्यान, मयतांच्या नातेवाईकांच्या तक्रारीवरून संबंधित कार चालकाविरुद्ध वरणगाव पोलिस ठाण्यात गुन्हा दाखल करण्याची प्रक्रिया सुरू करण्यात आली आहे. अपघाताचे नेमके कारण काय होते, याचा तपास पोलिसांकडून सुरू असून पुढील चौकशी केली जात आहे. (Accident News)