राजगुरुनगर : शहरातील वाडा रस्त्यावर अतिक्रमणे, रस्त्याच्या दुतर्फा होणारे बेशिस्त पार्किंग आणि हातगाड्यांवरील व्यवसायांमुळे वाहतुकीचा गंभीर प्रश्न निर्माण झाला आहे. धनश्री चौक ते संगम गार्डनदरम्यानचा रस्ता रुंद आणि काँक्रिटचा होऊनही अपघातांचा धोका कमी होण्याऐवजी वाढत असल्याचे चित्र आहे. फुटपाथवरच वाहने उभी केली जात असल्याने पादचार्‍यांना मुख्य रस्त्यावरून चालावे लागत आहे. त्यातच भरधाव दुचाकीस्वारांमुळे विद्यार्थी, ज्येष्ठ नागरिक आणि पादचार्‍यांच्या सुरक्षिततेचा प्रश्न ऐरणीवर आला आहे. मोठा अपघात झाल्यानंतरच प्रशासन जागे होणार का, असा संतप्त सवाल नागरिकांकडून उपस्थित केला जात आहे.

माजी आमदार दिलीप मोहिते पाटील यांच्या प्रयत्नातून राजगुरुनगर शहरातील वाडा रस्ता रुंद आणि काँक्रिटचा करण्यात आला. या रस्त्यावरील गटार व्यवस्थापनही करण्यात आले आहे. मात्र, रस्त्याच्या दोन्ही बाजूंना असलेल्या फुटपाथवर आणि पेव्हिंग ब्लॉक टाकलेल्या जागांवर दुचाकी व चारचाकी वाहनांचे पार्किंग केले जात आहे. त्याचबरोबर हातगाड्या, भाजीपाला विक्रेते आणि वडापावच्या गाड्यांमुळेही पादचार्‍यांसाठीची जागा व्यापली जात आहे. परिणामी, नागरिकांना वाहनांच्या गर्दीतून वाट काढत चालावे लागत असून अपघाताचा धोका वाढत आहे.

वाडा रस्ता हा राजगुरुनगर-वाडा-भीमाशंकर मार्गावरील महत्त्वाचा आणि वर्दळीचा रस्ता आहे. या मार्गावर दिवसभर वाहनांची ये-जा सुरू असते. त्यातच रस्त्याच्या कडेला होणारे अनधिकृत पार्किंग, हातगाड्या आणि रस्त्यालगत मांडलेली दुकाने यामुळे वाहतुकीला अडथळे निर्माण होत आहेत. काही तरुण आणि अल्पवयीन मुले भरधाव वेगाने दुचाकी चालवत असल्याने परिस्थिती अधिक गंभीर होत आहे. पादचारी, विद्यार्थी आणि ज्येष्ठ नागरिकांना रस्ता ओलांडताना तसेच फुटपाथवरून चालताना विशेष काळजी घ्यावी लागत आहे. रस्ता रुंद असूनही वाहतुकीचे योग्य नियोजन नसल्याने नागरिकांना अडचणींचा सामना करावा लागत आहे.

वाडा रस्त्यावरील अतिक्रमणे हटवून फुटपाथ पादचार्‍यांसाठी मोकळे करणे, बेशिस्त पार्किंगवर नियमित कारवाई करणे, भरधाव दुचाकीस्वारांवर नियंत्रण ठेवणे आणि वाहतुकीचे योग्य नियोजन करणे आवश्यक आहे. पोलीस आणि नगरपरिषद प्रशासनाने संयुक्त मोहीम राबवून या समस्येवर कायमस्वरूपी तोडगा काढावा, अशी नागरिकांची मागणी आहे. शहरातील वाडा रस्ता रुंद करण्यासाठी आणि आवश्यक सुविधा निर्माण करण्यासाठी खर्च करण्यात आला असताना, त्याच रस्त्यावर अतिक्रमणे व बेशिस्त पार्किंगमुळे नागरिकांची सुरक्षितता धोक्यात येत असेल, तर या विकासाचा उपयोग काय, असा सवाल उपस्थित होत आहे. एखादा भीषण अपघात घडल्यानंतरच प्रशासनाला जाग येणार का, असा संतप्त प्रश्न राजगुरुनगरकर विचारत आहेत.

कारवाई केवळ कागदावरच?

रस्त्यावर चारचाकी वाहने उभी असतानाही त्यांच्यावर ठोस कारवाई होत नसल्याची नागरिकांची तक्रार आहे. पोलीस या परिसरातून ये-जा करतात; मात्र बेशिस्त पार्किंग आणि भरधाव वाहनांवर सातत्याने कारवाई होत नसल्याने नियम मोडणार्‍यांवर नियंत्रण राहत नसल्याची भावना नागरिक व्यक्त करीत आहेत. दुसरीकडे, नगरपरिषदेकडून अतिक्रमण हटविण्याची कारवाई केली जात असली, तरी ती तात्पुरती ठरत असल्याचा आरोप आहे. लहान पथारी व्यावसायिकांवर कारवाई होते; मात्र रस्त्यावरील अतिक्रमणे आणि बेशिस्त पार्किंगचा प्रश्न कायमस्वरूपी सोडविण्यासाठी प्रभावी उपाययोजना होत नसल्याची नाराजी नागरिकांमध्ये आहे.

दुचाकीस्वाराचा अपघात; परिसरात गर्दी

मंगळवारी (दि. 27) वाडा रस्त्यावर एका दुचाकीस्वाराचा अपघात झाला. इतर वाहनांमुळे निर्माण झालेल्या परिस्थितीत दुचाकीवरील नियंत्रण सुटून तो खाली पडला आणि गंभीर जखमी झाला. या घटनेनंतर घटनास्थळी मोठी गर्दी झाली, तसेच वाहतूक कोंडी निर्माण झाली. या घटनेमुळे रस्त्यावरील वाहतुकीचे नियोजन आणि पादचार्‍यांच्या सुरक्षिततेचा प्रश्न पुन्हा ऐरणीवर आला आहे.