Retired ACP Fraud – जमीन खरेदीत मोठा फायदा करून देण्याच्या बहाण्याने एका निवृत्त सहाय्यक पोलिस आयुक्ताने व्यावसायिकाची तब्बल २ कोटी ४० लाखांची फसवणूक केली आहे. तसेच एका व्यक्तीच्या नावाने खोटे बँक खाते उघडून आणि बनावट कंपनीच्या नावाने व्यवहार करून रक्कम उकळल्याचे निष्पन्न झाले आहे. याप्रकरणी त्यांची पत्नी, मुलासह पाचजणांविरुद्ध चतुश्रृंगी पोलिस ठाण्यात गुन्हा दाखल झाला आहे. सुशिल शंकरराव कदम, नंदा कदम, अनिकेत कदम (तिघेही रा. तळवलकर जिमसमोर, फर्ग्युसन रस्ता), दत्ता केदारी (रा. बोरज, जि. पुणे) आणि बाळासाहेब आर. वाळुंज (रा. कामशेत, ता. मावळ) यांच्यावर गुन्हा दाखल झाला आहेत. अभिजीत विलास उंद्रे (वय ३५, रा. मांजरी खुर्द) यांनी तक्रार दिली आहे. ही घटना डिसेंबर २०१६ ते २१ मे २०२५ या कालावधीतील आहे. पोलिसांच्या माहितीनुसार, सुशिल कदम हे पुणे पोलीस दलातून सहाय्यक पोलीस आयुक्त म्हणून निवृत्त झाले आहे. जमीन खरेदी फसवणूक (संग्रहित छायाचित्र) तक्रारदार हे व्यावसायिक आहेत. कदम यांनी मुंबईतील बालकिशन गुप्ता यांची खेड तालुक्यातील बोरज येथे मोक्याच्या ठिकाणी १२ एकर जमीन असून ती विक्रीसाठी असल्याचे तक्रादारांना सांगितले. या जमिनीत गुंतवणूक केल्यास मोठा आर्थिक फायदा होईल, असे आमिष दाखवले. तक्रारदारांकडील रक्कम स्वीकारण्यासाठी बालकिशन गुप्ता यांच्या नावाने खोटे बँक खाते उघडले आणि तक्रारदारांकडून ५० लाखांची पे-ऑर्डर घेतली. तसेच सोलापूर येथील एका बँकेत ॲरिस्टोन मल्टीकेअर प्रा. लि. या नावाने बनावट खाते उघडून त्यामध्ये २५ लाख आरटीजीएसद्वारे जमा करण्यास भाग पाडले. त्यानंतर विविध कारणांनी तक्रारदारांकडून आणखी ३० लाख घेतले. याचबरोबर खरेदीखत करायचे असल्याचे सांगून १ कोटी ३५ लाख रोख स्वीकारले. त्यानंतर जमीनमालक बालकिशन गुप्ता हे जिवंत असतानाही ते मयत झाल्याचे सांगून व्यवहार पुढे ढकलण्यात आला. त्यामुळे तक्रारदार उंद्रे यांनी पैसे परत मागितले असता आरोपींनी टाळाटाळ केली. तसेच पैसे मागण्यासाठी वारंवार गेल्यास गायब करण्याची धमकी दिल्याचेही तक्रारीत म्हटले आहे. याचा तपास पोलिस उपनिरीक्षक जाधव करत आहेत. पत्नी, मुलाच्या खात्यात रक्कम सुशिल कदम यांची पत्नी नंदा कदम आणि मुलगा अनिकेत कदम यांच्या बँक खात्यावर फसवणुकीतील काही रक्कम पाठविण्यात आल्याचे तपासात समोर आले आहे. तसेच दत्ता केदारी आणि बाळासाहेब वाळुंज हे या व्यवहारात मध्यस्थ म्हणून काम करत असल्याने त्यांच्यावरही गुन्हा दाखल केला आहे.
