Parbhani News : मराठा आरक्षणच्या प्रश्नावरुन आतापर्यंत अनेक तरुणांनी आपल्या आयुष्याचा शेवट केला. आता पुन्हा एकदा अशीच घटना परभणी जिल्ह्यातील जिंतूर तालुक्यातील भोसी येथे घडली आहे.

मराठा आरक्षणाच्या प्रश्नावरुन एका ३० वर्षीय तरुणाने नैराश्यातून राहत्या घरात गळफास घेत आपले जीवन संपवले आहे. गणेश आश्रोबा ठोंबरे असे आत्महत्या केलेल्या तरुणाचे नाव असून, या घटनेने संपूर्ण गावावर शोककळा पसरली आहे. तर ठोंबरे कुटुंबावर दुःखाचा डोंगर कोसळला आहे. विशेष म्हणजे आत्महत्या केलेल्या तरुणाचा चुलत भाऊ पंचायत समिती सदस्य आहे.

नेमकं काय घडलं?

मिळालेल्या माहितीनुसार, गणेश ठोंबरे यांनी राहत्या घरात दोरीच्या साहाय्याने गळफास घेतला. हा प्रकार निदर्शनास येताच नातेवाइकांनी त्यांना तातडीने जिंतूर ग्रामीण रुग्णालयात दाखल केले. मात्र, तेथील वैद्यकीय अधिकाऱ्यांनी तपासणीअंती मृत घोषित केले.

या घटनेची माहिती मिळताच बामणी पोलिसांनी तातडीने घटनास्थळी आणि रुग्णालयात पोहोचून प्राथमिक पंचनामा केला. या वेळी पोलिसांना गणेश यांच्या खिशात एक चिठ्ठी आढळून आली. यामध्ये “मराठा समाजाला आरक्षण मिळत नसल्याने आपण हे टोकाचे पाऊल उचलत आहोत, सरकारने आरक्षणाचा प्रश्न लवकरात लवकर सोडवावा,” अशा आशयाचा मजकूर असल्याचे पोलिसांनी सांगितले. या प्रकरणाचा पुढील तपास पोलीस करत आहेत.

चुलत भाऊ म्हणाले…

गणेश हे मागील दोन-तीन दिवसांपासून मराठा आरक्षणाच्या प्रश्नाबाबत तीव्र नाराजी व्यक्त करत होते आणि त्यावरून प्रचंड मानसिक तणावात होते. याच नैराश्यातून त्यांनी हे कृत्य केल्याचे नातेवाइकांनी पोलिसांना सांगितले आहे, अशी माहिती गणेश ठोंबरे यांचे चुलत भाऊ आणि पंचायत समिती सदस्य भास्करराव ठोंबरे यांनी दिली. मृत गणेश ठोंबरे यांच्या पश्चात वडील, पत्नी, एक मुलगा आणि एक मुलगी असा परिवार आहे. कुटुंबाची आर्थिक परिस्थिती अत्यंत बेताची आहे.

IP Rating: पावसात तुमचा फोन किती सुरक्षित? २ मिनिटांत तपासा IP रेटिंग, पाणी आणि धुळीपासून किती संरक्षण मिळते तेही कळेल!