धुळे/जालना : दिल्लीतील जंतर-मंतर येथे विद्यार्थ्यांवर झालेल्या कथित लाठीचार्जच्या निषेधार्थ धुळे जिल्ह्यातील शिरपूर येथे विद्यार्थ्यांनी आंदोलन छेडले. करवंद नाका परिसरात झालेल्या या आंदोलनात केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून राजीनामा द्यावा, तसेच संपूर्ण प्रकरणाची सीबीआयमार्फत निष्पक्ष चौकशी करण्यात यावी, अशी मागणी करण्यात आली.

आंदोलनात मोठ्या संख्येने विद्यार्थी सहभागी झाले होते. यावेळी केंद्र सरकारविरोधात घोषणाबाजी करत विद्यार्थ्यांनी शांततापूर्ण आंदोलन केले. विद्यार्थ्यांचा आवाज दडपण्याचा प्रयत्न लोकशाहीसाठी घातक असल्याची भूमिका आंदोलकांनी मांडली. आंदोलनादरम्यान स्वाक्षरी मोहीमही राबविण्यात आली. दरम्यान, आंदोलनाच्या पार्श्वभूमीवर कोणताही अनुचित प्रकार घडू नये म्हणून करवंद नाका परिसरात पोलिसांचा कडेकोट बंदोबस्त तैनात करण्यात आला होता.

दिल्लीतील लाठीचार्जच्या निषेधार्थ जालना जिल्हा बंद   (Jantar Mantar Protest)

दिल्ली येथे आंदोलकांवर झालेल्या लाठीचार्जच्या निषेधार्थ आज वंचित बहुजन आघाडीच्या वतीने जालना जिल्हा बंदची हाक देण्यात आली होती. या बंदला जिल्ह्यात उत्स्फूर्त प्रतिसाद मिळाला. दिल्लीतील जंतर-मंतर येथे नीट (NEET) प्रकरणी विद्यार्थ्यांचे आंदोलन सुरू असताना पोलिसांनी आंदोलकांवर लाठीचार्ज केल्याचा आरोप करण्यात आला. या घटनेच्या निषेधार्थ वंचित बहुजन आघाडीने जालना जिल्हा बंद पुकारला. दरम्यान, कार्यकर्त्यांनी ठिकठिकाणी घोषणाबाजी करत निषेध व्यक्त केला.