Hatkanangale Lok Sabha Election 2024| हातकणंगले लोकसभा मतदारसंघातून निवडणुक लढवणारच असल्याचा ठाम निश्चय इचलकरंजीचे अपक्ष आमदार प्रकाश आवाडे यांनी केला होता. मात्र मुख्यमंत्री एकनाथ शिंदे यांच्या भेटीनंतर ही आवाडे यांनी माघार घेत निवडणुक न लढवण्याचा निर्णय घेतला. प्रकाश आवाडे यांच्या घरी मुख्यमंत्री एकनाथ शिंदे, शंभूराज देसाई, रामदास कदम यांच्यासह पोहोचले होते. यावेळी प्रकाश आवाडे यांच्याशी चर्चा करत यांची मनधरणी केली. त्यामुळे आवाडे यांचे बंड थंड झाल्याचे पाहायला मिळाले.

आज धैर्यशील मानेंचा उमेदवारी अर्ज दाखल करण्यापूर्वीच मुख्यमंत्री एकनाथ शिंदे कोल्हापुरात प्रकाश आवाडे यांच्या घरी पोहोचले. त्यानंतर आवाडे यांच्याशी एकनाथ शिंदे यांनी चर्चा केली. त्यानंतर मुख्यमंत्री एकनाथ शिंदे प्रकाश आवाडे यांना सोबत घेऊनच माने यांचा उमेदवारी अर्ज दाखल करण्यासाठी निघाले. त्यामुळे एक प्रकारे मुख्यमंत्री शिंदे यांना हातकणंगले मतदारसंघांमध्ये महायुतीमध्ये झालेली कोंडी फोडण्यात यश आलं आहे.

पंचरंगी लढत टळणार Hatkanangale Lok Sabha Election 2024|

आवाडे यांनी माघार घेण्याचा निर्णय घेतल्याने येथील पंचरंगी लढत टळणार आहे. कारण येथे शिवसेना, स्वाभीमानी, ठाकरे गट, वंचित आणि आवाडे अशी पंचरंगी लढत होणार होती. मात्र, मुख्यमंत्री एकनाथ शिंदे यांनी आमदार आवाडे यांच्याशी चर्चा करुन निवडणुकीतून माघार घेण्यासाठी राजी केले.

दोन दिवसांपूर्वी कोल्हापूरातील शिवसेनेच्या दोन्ही उमेदवारांच्या प्रचाराला आलेल्या मुख्यमंत्री शिंदी यांनी आवाडे यांची भेट घेत त्यांना माघार घेण्याची विनंती केली होती. मात्र, या भेटीनंतरही आवाडे निवडणूक लढवण्यावर ठाम होते. मात्र, आज हातकणंगलेतून धैर्यशील माने आणि कोल्हापूरातून संजय मंडलिक यांचा उमेदवारी अर्ज भरण्यापूर्वी मुख्यमंत्री एकनाथ शिंदे, कॅबिनेट मंत्री शंभूराजे देसाई, माजी मंत्री रामदास कदम या नेत्यांनी आवाडेंना पुन्हा विनंती केली असता, त्यांनी निवडणूक न लढण्याचा निर्णय घेतला.

हातकणंगलेत अशी होणार लढत Hatkanangale Lok Sabha Election 2024|

हातकणंगले मतदारसंघात शिवसेनेकडून खासदार धैर्यशील माने यांना पुन्हा संधी देण्यात आली आहे. तर त्यांचे पारंपरिक प्रतिस्पर्धी माजी खासदार राजू शेट्टी स्वाभीमानी शेतकरी संघटनेकडून लढत आहेत. दरम्यान राजू शेट्टी यांनी महाविकास आघाडी तसेच उद्धव ठाकरे यांच्या शिवसेनेकडून लढण्यास नकार दिला. त्यामुळे उद्धव ठाकरेंच्या शिवसेनेकडून माजी आमदार सत्यजीत पाटील सरुडकर यांना संधी देण्यात आली आहे. तर वंचित बहुजन आघाडीने डी.सी पाटील यांना उमेदवारी दिली आहे. त्यामुळे हातकणंगलेमध्ये मोठी चुरशीची लढत पाहायला मिळणार आहे.