Rashmika Mandanna: अभिनेत्री रश्मिका मंदाना पुन्हा एकदा चर्चेत आली आहे. मात्र यावेळी तिच्या चित्रपटामुळे नव्हे, तर तिने स्वतःच्या नावात केलेल्या बदलामुळे चाहत्यांचे लक्ष वेधले आहे. रश्मिकाने एका सार्वजनिक कार्यक्रमात स्वतःची ओळख ‘रश्मिका मंदाना देवरकोंडा’ अशी करून दिली. त्यानंतर सोशल मीडियावर तिची जोरदार चर्चा सुरू झाली आहे.

अभिनेता विजय देवरकोंडा आणि रश्मिका मंदाना यांचं नाव गेल्या अनेक वर्षांपासून एकत्र जोडलं जात आहे. आता रश्मिकाने स्वतःच्या नावासोबत ‘देवरकोंडा’ हे आडनाव जोडल्यामुळे चाहत्यांमध्ये आश्चर्य आणि उत्सुकता वाढली आहे.

अलीकडेच तेलंगणातील थुम्मनपेट या गावात एक विशेष कार्यक्रम आयोजित करण्यात आला होता. हे गाव विजय देवरकोंडाच्या वडिलांचं मूळ गाव आहे. या कार्यक्रमात विजय आणि रश्मिका यांनी एकत्र सहभाग घेतला. देवरकोंडा फाउंडेशनच्या माध्यमातून सरकारी शाळांमधील १८० हुशार विद्यार्थ्यांना शिष्यवृत्ती देण्याचा उपक्रम राबवण्यात आला.

Wait.. I’m there toooo.. 🐒

Your love,
Rashmika Mandanna Deverakonda. 🥰🥰🤍 https://t.co/T4PxqB0VxD

— Rashmika Mandanna (@iamRashmika) June 14, 2026

या कार्यक्रमादरम्यान रश्मिकाने उपस्थितांना संबोधित करताना सांगितलं, “आज मी जास्त बोलणार नाही. पण देवरकोंडा फाउंडेशनच्या माध्यमातून आम्ही एक अतिशय चांगली सुरुवात करत आहोत. या उपक्रमाची सुरुवात अचमपेट आणि थुम्मनपेट येथून होत आहे. हे माझ्या सासऱ्यांचं गाव आहे. आज मी तुमच्यासमोर ‘रश्मिका मंदाना देवरकोंडा’ म्हणून उभी आहे आणि मला याचा खूप आनंद होत आहे.”

रश्मिकाच्या या वक्तव्यामुळे उपस्थितांमध्येही मोठी चर्चा रंगली. त्यानंतर सोशल मीडियावरही याचे अनेक व्हिडिओ आणि पोस्ट व्हायरल झाले.

दरम्यान, विजय देवरकोंडाने सोशल मीडिया प्लॅटफॉर्म X वर या उपक्रमाची माहिती देत काही छायाचित्रे शेअर केली. त्याने सांगितलं की, ४५ शाळांमधील १८० विद्यार्थ्यांना शिष्यवृत्ती देण्याच्या उपक्रमाचं पहिलं वर्ष यशस्वीरीत्या पूर्ण झालं आहे. तसेच जून २०२७ पर्यंत हा उपक्रम आणखी मोठ्या प्रमाणावर राबवण्याचा त्यांचा मानस असल्याचंही त्याने स्पष्ट केलं.

विजयच्या या पोस्टवर रश्मिकानेही प्रतिक्रिया दिली. तिने मजेशीर अंदाजात, “थांबा, मीसुद्धा तिथेच आहे. तुमची प्रिय रश्मिका मंदाना देवरकोंडा,” असं लिहिलं. तिच्या या प्रतिक्रियेनंतर चाहत्यांमध्ये नव्या चर्चांना सुरुवात झाली.

काही चाहत्यांनी या दोघांच्या समाजसेवेच्या कामाचं कौतुक केलं. विद्यार्थ्यांच्या शिक्षणासाठी त्यांनी घेतलेल्या पुढाकाराचं अनेकांनी स्वागत केलं. तर काही जणांनी रश्मिकाने सार्वजनिकरीत्या ‘देवरकोंडा’ हे नाव स्वीकारल्याबद्दल आश्चर्य व्यक्त केलं.

दरम्यान, रश्मिका आणि विजय लवकरच ‘राणाबली’ या चित्रपटात एकत्र दिसणार आहेत. हा एक पीरियड चित्रपट असून तो ११ सप्टेंबर २०२६ रोजी जगभरातील चित्रपटगृहांमध्ये अनेक भाषांमध्ये प्रदर्शित होणार आहे. त्यामुळे चाहत्यांमध्ये या चित्रपटाबद्दलही मोठी उत्सुकता आहे.