Ranjangaon Crime :  पुणे-अहमदनगर महामार्गालगत वामन वाईन्स परमिट रूमसमोर झालेल्या मारहाणीत तरुण गंभीर जखमी झाला. या प्रकरणी रांजणगाव एमआयडीसी पोलिसांनी धनंजय साळुंखे, गोरख मोरे, मयूर कांबळे यांच्यासह सहा ते सात अनोळखी व्यक्तींविरुद्ध जीवे ठार मारण्याचा प्रयत्न केल्याचा गुन्हा दाखल केला आहे.

पोलिसांनी दिलेल्या माहितीनुसार, १८ सप्टेंबर रोजी रात्री साडेअकराच्या सुमारास ही घटना घडली. आदित्य तुषार शितोळे (१९, रा. खेडकर वस्ती, रांजणगाव गणपती) यांनी याबाबत फिर्याद दिली आहे.

पूर्वी झालेल्या भांडणाच्या कारणावरून संशयितांनी शितोळे यांना लाथा-बुक्क्यांनी तसेच दगड आणि फायटरने मारहाण केल्याचे फिर्यादीत नमूद आहे. त्यांना वाचवण्यासाठी आलेल्या दादा खेडकर (२८) यांच्यावरही हल्ला करण्यात आल्याचा आरोप आहे. या वेळी कोयता, दगड आणि काठीचा वापर केल्याचे फिर्यादीत म्हटले आहे.

हल्ल्यात दोघेही गंभीर जखमी झाले. या प्रकरणी शस्त्र अधिनियमातील कलम ४ व २५ नुसारही गुन्हा दाखल करण्यात आला आहे. सहा ते सात अनोळखी संशयितांचा पोलीस शोध घेत आहेत. पुढील तपास पोलीस उपनिरीक्षक निळकंठ तिडके करीत आहेत.