Ram Temple : अयोध्येतील राम मंदिर (Ram Temple) देणगी घोटाळा प्रकरणात विशेष तपास पथकाने (एसआयटी) आरोपपत्र दाखल केले आहे. उत्तर प्रदेश सरकारने सोमवारी सर्वोच्च न्यायालयात ही माहिती दिली. त्यानंतर न्यायालयाने या प्रकरणाशी संबंधित याचिका निकाली काढत पुढील सुनावणी अयोध्येतील स्थानिक न्यायालयात होईल, असे स्पष्ट केले.

उत्तर प्रदेश सरकारच्या वतीने सॉलिसिटर जनरल तुषार मेहता यांनी सरन्यायाधीश सूर्यकांत यांच्या अध्यक्षतेखालील खंडपीठाला एसआयटीच्या तपासाची माहिती दिली. मंदिरासाठी (Ram Temple) मिळालेल्या देणग्यांची मोजणी करताना काही रकमेचा अपहार झाल्याचे तपासात निष्पन्न झाल्याचे त्यांनी सांगितले. काही आरोपींनी अपहार केलेली रक्कम मालमत्ता खरेदीत गुंतवली, तर काहींनी ती बँकेत ठेवींच्या स्वरूपात जमा केल्याचेही न्यायालयाला सांगण्यात आले.

देणगीतील कथित गैरव्यवहाराची स्वतंत्र चौकशी करण्याची मागणी करणाऱ्या याचिकाकर्त्यांना अयोध्येतील स्थानिक न्यायालयातील खटल्यात सहकार्य करण्याची मुभा खंडपीठाने दिली. मात्र, या प्रकरणाच्या गुणवत्तेबाबत सर्वोच्च न्यायालयाने कोणतेही भाष्य केलेले नाही, असेही स्पष्ट करण्यात आले.

दरम्यान, राम मंदिर (Ram Temple) उभारण्यात आलेली जमीन अयोध्या वादावरील मूळ निकालाशी संबंधित आहे का, याबाबत दाखल करण्यात आलेली आणखी एक याचिकाही न्यायालयाने फेटाळली. यापूर्वी २१ सप्टेंबर रोजी एसआयटीने २५ सप्टेंबरपर्यंत पहिले आरोपपत्र दाखल करण्याचे आश्वासन न्यायालयाला दिले होते.