Stock Market : जागतिक बाजारातील सकारात्मक कल आणि कच्च्या तेलाच्या किमतीतील घसरणीमुळे दोन दिवसांच्या घसरणीनंतर बुधवारी प्रमुख इक्विटी निर्देशांक सेन्सेक्स आणि निफ्टीमध्ये तेजी आली.

मुंबई शेअर बाजाराचा निर्देशांक सेन्सेक्स 443.97 अंकांनी, म्हणजेच 0.58 टक्क्यांनी वाढून 76,922.64 वर स्थिरावला. राष्ट्रीय शेअर बाजाराचा निर्देशांक निफ्टी 140.10 अंकांनी, म्हणजेच 0.59 टक्क्यांनी वधारून 24,005.85 वर बंद झाला.

सेन्सेक्समधील इटरनल, एशियन पेंट्स, हिंदुस्तान युनिलिव्हर, अदानी पोर्ट्स, महिंद्रा अँड महिंद्रा आणि स्टेट बँक ऑफ इंडिया हे प्रमुख विजेते ठरले. एचसीएल टेक, टेक महिंद्रा, टाटा कन्सल्टन्सी सर्व्हिसेस, टाटा स्टील आणि इन्फोसिस हे पिछाडीवर होते.

जागतिक तेल बेंचमार्क असलेल्या ब्रेंट क्रूडमध्ये 0.88 टक्क्यांची घसरण होऊन ते प्रति बॅरल 72.31 अमेरिकन डॉलरवर आले. बीएसई मिडकॅप सिलेक्ट इंडेक्स 0.20 टक्क्यांनी किंचित वधारला आणि स्मॉलकॅप सिलेक्ट इंडेक्सने 0.02 टक्क्यांची किरकोळ वाढ नोंदवली. एक्सचेंजच्या आकडेवारीनुसार, परदेशी संस्थागत गुंतवणूकदारांनी मंगळवारी 2,556.75 कोटी रुपयांच्या इक्विटीची विक्री केली.

क्षेत्रीय स्तरावर, रिअ‍ॅल्टी 3.56 टक्के, एफएमसीजी (1.76 टक्के), सेवा (1.35 टक्के), ग्राहक वस्तू (1.20 टक्के), ऑटो (1.10 टक्के), मिडस्मॉल प्रायव्हेट बँक्स क्वालिटी टिल्ट (0.97 टक्के) आणि पीएसयू बँक (0.81 टक्के) या क्षेत्रांनी मोठी झेप घेतली. फोकस्ड आयटी 2.53 टक्क्यांनी, आयटी (1.94 टक्के), मेटल (0.87 टक्के) आणि टेलिकम्युनिकेशन (0.34 टक्के) क्षेत्रात घसरण झाली.

बीएसईवर एकूण 2,276 शेअर्समध्ये वाढ झाली, तर 1,995 शेअर्समध्ये घट झाली आणि 176 शेअर्स स्थिर राहिले. बजाज ब्रोकिंग रिसर्चनुसार, सुधारत असलेली जागतिक भावना, कमी होत असलेला भू-राजकीय तणाव आणि कच्च्या तेलाच्या स्थिर किमतींमुळे भारतीय बेंचमार्क निर्देशांक सकारात्मकतेने उघडले आणि संपूर्ण सत्रात त्यांनी आपली वाढ कायम ठेवली.

अनेक अडथळे कमी होऊ लागल्याने देशांतर्गत बाजारपेठांनी आशावादी वातावरणात 2026 च्या दुसर्‍या सहामाहीत प्रवेश केला आहे. अपेक्षित अमेरिका-भारत व्यापार करार, मध्य पूर्वेतील तणाव कमी होणे आणि तेलाच्या किमती अनुकूल असणे हे सकारात्मक भावनांचे प्रमुख चालक घटक म्हणून उदयास आले आहेत, असे जिओजित इन्व्हेस्टमेंट्स लिमिटेडचे संशोधन प्रमुख विनोद नायर म्हणाले.

जागतीक बाजारात तेजी
आशियाई बाजारांमध्ये, जपानचा निक्केई 225 निर्देशांक आणि शांघायचा एस.एस.ई. कंपोझिट निर्देशांक वाढीसह स्थिरावले, तर दक्षिण कोरियाचा कोस्पी निर्देशांक घसरणीसह बंद झाला. हाँगकाँगमध्ये बाजार बंद होते, तर युरोपमधील बाजार बहुतांशी घसरणीसह व्यवहार करत होते.अमेरिकन बाजार मंगळवारी सकारात्मक पातळीवर बंद झाले.

केपीआयटी टेकचा शेअर कोसळला 17 टक्क्यांनी –

गेल्या काही आठवड्यांत महसुलात अचानक घट झाल्यामुळे, आर्थिक वर्ष 2027 च्या पहिल्या तिमाहीतील आर्थिक कामगिरी अपेक्षेपेक्षा कमी राहण्याची शक्यता असल्याचे कंपनीने सांगितल्यानंतर, केपीआयटी टेक्नॉलॉजीजच्या शेअर्समध्ये बुधवारी 17 टक्क्यांची घसरण झाली. एनएसईवर, हा शेअर 16.97 टक्क्यांनी घसरून 557.55 रुपयांवर बंद झाला.

कंपनीने महसुलात सुमारे 1 टक्क्याची घट अपेक्षित असल्याचा इशारा दिला आहे. याचे मुख्य कारण म्हणजे काही युरोपियन वाहन कंपन्यांनी अलीकडेच जाहीर केलेल्या नफ्यातील घसरणीच्या इशार्‍यांमुळे आणि प्रतिकूल व्यावसायिक दृष्टिकोनामुळे अचानक उचललेली पाऊले.

मंगळवारी शेअर बाजाराला दिलेल्या माहितीनुसार, या परिणामाची आधी कल्पना नव्हती आणि तो केवळ गेल्या काही आठवड्यांतच दिसून आला आहे.
कंपनीने म्हटले आहे की, दीर्घकाळात मात्र, ग्राहकांकडून होणार्‍या खर्च कपातीच्या उपायांमुळे अधिक आउटसोर्सिंग आणि ऑफशोरिंग होईल, ज्यामध्ये कंपनीच्या उत्पादनांद्वारे आणि सोल्यूशन्सद्वारे अधिक ऑटोमेशनचा समावेश असेल.

गेल्या काही आठवड्यांत महसुलात अचानक घट झाल्यामुळे, आर्थिक वर्ष 2027 च्या पहिल्या तिमाहीतील आर्थिक कामगिरी पूर्वीच्या अपेक्षेपेक्षा कमी असेल अशी कंपनीला अपेक्षा आहे, असे केपीआयटीने म्हटले आहे.

तथापि, कंपनीने म्हटले आहे की, आर्थिक वर्षाच्या दुसर्‍या सहामाहीत शाश्वत, फायदेशीर वाढ दर्शवण्याच्या क्षमतेबद्दल तिला विश्वास आहे. आर्थिक वर्ष 2027 च्या चौथ्या तिमाहीत ठोस तिमाही वाढ नोंदवून आर्थिक वर्ष 2028 आणि त्यानंतरच्या काळासाठी विकासाचा भक्कम पाया रचला जाईल.