Rajnath Singh on Delhi blast। दिल्लीतील लाल किल्ल्याबाहेर झालेल्या स्फोटात झालेल्या जीवितहानीबद्दल संरक्षण मंत्री राजनाथ सिंह यांनी तीव्र दुःख व्यक्त केले. आज त्यांनी, “तपास यंत्रणा या घटनेचा जलद आणि सखोल तपास करत आहेत आणि अहवाल लवकरच सार्वजनिक केला जाईल” अशी माहिती दिली. तसेच या घटनेला दोषी असणाऱ्यांना सोडणार नसल्याचा इशारा देखील त्यांनी दिला आहे. दिल्ली स्फोटाविषयी बोलताना संरक्षण मंत्री राजनाथ सिंह यांनी, “मी देशवासीयांना खात्री देऊ इच्छितो की देशातील प्रमुख संस्था या घटनेचा अत्यंत गांभीर्याने तपास करत आहेत. तपासाचे निकाल लवकरच समोर येतील आणि या दुर्घटनेला जबाबदार असलेल्यांना कोणत्याही परिस्थितीत सोडले जाणार नाही.” असा थेट इशारा दिला आहे. फरिदाबादमध्ये पोलिसांची शोध मोहीम सुरू Rajnath Singh on Delhi blast। फरिदाबादमध्ये जम्मू-काश्मीरमधील एका डॉक्टरच्या भाड्याच्या दोन खोल्यांमधून मोठ्या प्रमाणात स्फोटके आणि ज्वलनशील पदार्थ जप्त केल्यानंतर, मंगळवारी जिल्ह्याच्या विविध भागात मोठ्या प्रमाणात शोध मोहीम सुरू आहे. दिल्लीतील लाल किल्ल्याजवळ सोमवारी संध्याकाळी झालेल्या स्फोटाचा संबंध फरिदाबादमधील संशयित दहशतवादी मॉड्यूलशीही जोडला गेला आहे. या स्फोटात बारा जणांचा मृत्यू झाला आहे. पोलिसांनी आज सांगितले की, अल फलाह विद्यापीठात एक पथक तळ ठोकून आहे, जिथे काश्मिरी डॉक्टर गेल्या साडेतीन वर्षांपासून राहत होते. विद्यापीठातील कर्मचारी आणि डॉक्टरांचीही चौकशी केली जात आहे. एका वरिष्ठ पोलिस अधिकाऱ्याच्या मते, धौज पोलिस स्टेशन परिसरात अनेक पोलिस कर्मचारी शोध मोहीम राबवत आहेत. तपासात असे दिसून आले आहे की तेथे ताब्यात घेतलेल्या एका मौलवीने सांगितले की त्याने त्याची खोली एका ऑटो-रिक्षा चालकाला भाड्याने दिली होती, ज्याने नंतर ती खोली डॉ. मुझम्मिलला त्याचे “सामान” ठेवण्यासाठी दिली. Rajnath Singh on Delhi blast। समोर आलेल्या माहितीनुसार, जैश-ए-मोहम्मद आणि अन्सार गजवतुल हिंदशी जोडलेल्या “व्हाइट-कॉलर” दहशतवादी मॉड्यूलमध्ये सहभागी असल्याबद्दल मुझम्मिल आणि इतर दोन डॉक्टरांसह आठ जणांना अटक करण्यात आली आहे. जम्मू-काश्मीरच्या पुलवामा जिल्ह्यातील कोइल येथील रहिवासी आणि अल फलाह विद्यापीठातील डॉक्टर मुझम्मिल घनी (३५) यांच्या मालकीच्या फरिदाबादमधील दोन भाड्याच्या खोल्यांमधून मोठ्या प्रमाणात शस्त्रे आणि दारूगोळा जप्त करण्यात आला.
