पुणे  – शहरात पुणे पुस्तक महोत्सव सलग दुसऱ्या वर्षी यशस्वीरित्या आयोजन केल्याचे निमित्त साधून नॅशनल बुक ट्रस्टचे विश्वस्त राजेश पांडे यांचा सत्कार करण्यात येणार आहे. येत्‍या शनिवारी (दि. 25) सायंकाळी पाच वाजता महाराष्ट्र साहित्य परिषदेच्या माधवराव पटवर्धन सभागृहात हा सत्‍कार सोहळा होणार आहे.

अखिल भारतीय मराठी प्रकाशक संघ, संवाद, पुणे आणि महाराष्ट्र साहित्य परिषदेतर्फे या सोहळ्याचे आयोजन करण्यात आले आहे.
माजी केंद्रीय मंत्री प्रकाश जावडेकर यांच्या हस्ते सत्‍कार करण्यात येणार असून, महाराष्ट्र साहित्य परिषदेचे कार्याध्यक्ष प्रा.मिलिंद जोशी यांची प्रमुख उपस्थिती असणार आहे, अशी माहिती प्रकाशक संघाचे अध्यक्ष राजीव बर्वे आणि संवाद, पुणेचे अध्यक्ष सुनील महाजन यांनी निवेदनाद्वारे दिली आहे.

यंदाचा पुस्तक महोत्सव भव्य-दिव्य स्वरूपात आयोजित केल्यामुळे लाखो वाचकांनी महोत्सवास भेट दिली आणि पुस्तक विक्री चांगली झाली. पुस्तक महोत्सवाच्या यशस्वी आयोजनाबद्दल राजेश पांडे आणि त्यांच्या सहकाऱ्यांविषयी कृतज्ञता व्यक्त करण्यासाठी अभिनंदन सोहळ्याचे आयोजन करण्यात आले आहे. या सोहळ्यानंतर अभिजात वाचन संस्कृतीचा द्विपात्री संगीत-नाट्य आविष्कार ‌‘अक्षरगाणी‌’ हा कार्यक्रम सादर केला जाणार आहे. कार्यक्रम सर्वांसाठी खुला आहे.