Rajya Sabha : महाराष्ट्रातील राज्यसभा पोटनिवडणुकीसाठी राष्ट्रवादी काँग्रेस (अजित पवार गट)चे उमेदवार राजेंद्र जैन यांनी सोमवारी उमेदवारी अर्ज दाखल केला. महायुतीतील प्रमुख नेत्यांच्या उपस्थितीत अर्ज दाखल झाल्याने ही निवडणूक बिनविरोध होण्याची शक्यता आहे.

उपमुख्यमंत्री सुनेत्रा पवार यांनी राज्यसभेच्या सदस्यत्वाचा राजीनामा दिल्यानंतर ही जागा रिक्त झाली होती. त्या जागेसाठी १८ जून रोजी पोटनिवडणूक होणार आहे. राष्ट्रवादी काँग्रेसने राजेंद्र जैन यांना उमेदवारी देत विदर्भातील संघटनात्मक नेतृत्वावर विश्वास व्यक्त केला आहे.  (Rajya Sabha )

राज्यसभा उमेदवारीच्या शर्यतीत माजी मंत्री छगन भुजबळ यांचे नाव आघाडीवर असल्याची चर्चा होती. तसेच खासदार नवनीत राणा यांनाही उमेदावरी मिळणार असल्याची चर्चा रंगली होती. मात्र पक्षांतर्गत चर्चेनंतर अखेर राजेंद्र जैन यांच्या नावावर शिक्कामोर्तब करण्यात आले. राष्ट्रवादी काँग्रेसचे प्रदेशाध्यक्ष सुनील तटकरे यांनी त्यांच्या उमेदवारीची अधिकृत घोषणा केली होती.

प्रफुल्ल पटेल यांचे निकटवर्तीय –  (Rajya Sabha )

राजेंद्र जैन यांची ओळख राष्ट्रवादी काँग्रेसचे ज्येष्ठ नेते आणि माजी केंद्रीय मंत्री प्रफुल्ल पटेल यांचे अत्यंत विश्वासू सहकारी अशी आहे. राजकीय कारकिर्दीच्या सुरुवातीच्या काळात त्यांनी प्रफुल्ल पटेल यांचे स्वीय सहाय्यक (पीए) म्हणून काम केले. त्यानंतर संघटनात्मक कामाच्या जोरावर त्यांनी पक्षात स्वतःचे वेगळे स्थान निर्माण केले.

पूर्व विदर्भातील राष्ट्रवादी काँग्रेसचे संघटन मजबूत करण्यात, स्थानिक नेत्यांमध्ये समन्वय साधण्यात आणि निवडणूक रणनीती आखण्यात त्यांची महत्त्वपूर्ण भूमिका राहिली आहे. त्यामुळे विदर्भातील राष्ट्रवादीचे ‘चाणक्य’ म्हणून त्यांच्याकडे पाहिले जाते.

राष्ट्रवादी काँग्रेस पक्षाच्या वतीने राज्यसभेसाठी माजी आमदार राजेंद्र जैन यांनी आज उमेदवारी अर्ज दाखल केला. यावेळी उपस्थित राहून त्यांना शुभेच्छा दिल्या व त्यांचे अभिनंदन केले.

याप्रसंगी प्रदेशाध्यक्ष खासदार सुनिल तटकरे, मंत्री छगन भुजबळ, मंत्री आशिष शेलार, मंत्री भरत गोगावले,… pic.twitter.com/uk0izCv05V

— Praful Patel (@praful_patel) June 8, 2026

विधान परिषद ते राज्यसभा –  (Rajya Sabha)

पक्षाने त्यांच्या संघटनात्मक कौशल्याची दखल घेत त्यांना भंडारा-गोंदिया स्थानिक स्वराज्य संस्था मतदारसंघातून विधान परिषदेत पाठविले होते. आमदार म्हणून त्यांनी ग्रामीण विकास, सिंचन, शिक्षण आणि पायाभूत सुविधांशी संबंधित प्रश्न सातत्याने मांडले.

 

२०१६ मध्ये भंडारा-गोंदिया स्थानिक स्वराज्य संस्था मतदारसंघातील विधान परिषद निवडणुकीत भाजपचे परिण फुके यांनी त्यांचा निसटता पराभव केला होता. मात्र या पराभवानंतरही पक्षातील त्यांचे राजकीय वजन कायम राहिले.  (Rajya Sabha)

विदर्भातील राष्ट्रवादीचे ‘संकटमोचक’-

राष्ट्रवादी काँग्रेसमधील विविध राजकीय घडामोडी, पक्षफुटी आणि संघटनात्मक आव्हानांच्या काळात पूर्व विदर्भात पक्षाची ताकद टिकवून ठेवण्यात राजेंद्र जैन यांनी महत्त्वाची भूमिका बजावली. भंडारा, गोंदिया आणि नागपूर जिल्ह्यांतील कार्यकर्त्यांचे जाळे मजबूत ठेवणे, स्थानिक नाराजी हाताळणे आणि पक्षाशी कार्यकर्त्यांना जोडून ठेवणे यासाठी ते ओळखले जातात.

शिक्षण क्षेत्रातही ठसा-

राजकारणाबरोबरच शिक्षण क्षेत्रातही जैन यांचे योगदान लक्षणीय मानले जाते. गोंदिया एज्युकेशन सोसायटीचे सचिव म्हणून त्यांनी दीर्घकाळ काम केले असून ग्रामीण आणि दुर्गम भागातील विद्यार्थ्यांना शैक्षणिक संधी उपलब्ध करून देण्यासाठी विविध उपक्रम राबविले आहेत.

निष्ठेला मिळाले फळ-

राजकीय विश्लेषकांच्या मते, राज्यसभेची उमेदवारी ही राजेंद्र जैन यांच्या दीर्घकालीन निष्ठा, संघटनात्मक कामगिरी आणि पक्षासाठीच्या योगदानाची दखल आहे. प्रसिद्धीपासून दूर राहून पडद्यामागे संघटना उभी करणाऱ्या नेत्याला पक्षाने राष्ट्रीय राजकारणात संधी दिल्याचे मानले जात आहे.

राजेंद्र जैन यांना राज्यसभेत पाठवून राष्ट्रवादी काँग्रेसने विदर्भाला प्रतिनिधित्व देण्याचा स्पष्ट संदेश दिला आहे. पश्चिम महाराष्ट्र, मुंबई आणि मराठवाडा केंद्रित राजकारणात पूर्व विदर्भातील एका संघटनात्मक नेत्याला दिल्लीत पाठविण्याचा निर्णय राजकीयदृष्ट्या महत्त्वाचा मानला जात आहे.

स्वीय सहाय्यकापासून राज्यसभेपर्यंतचा प्रवास करणारे राजेंद्र जैन आता राष्ट्रीय राजकारणात आपली छाप उमटविण्यास सज्ज झाले आहेत.