Rajasthan Election 2026 : राजस्थान पंचायत निवडणुकीत काँग्रेसची आघाडी; भाजप पिछाडीवर…
Rajasthan Election 2026 : राजस्थान पंचायत निवडणुकीत काँग्रेसने ३१३ जागा जिंकल्या, तर भाजपला २१४ जागा मिळाल्या. ३७ जिल्ह्यांत मतमोजणी सुरू; चार जिल्ह्यांचे निकाल १७ डिसेंबरला.

Rajasthan Election 2026 : राजस्थानमधील पंचायत समिती आणि जिल्हा परिषद निवडणुकांच्या मतमोजणीत काँग्रेसने भाजपपेक्षा आघाडी घेतली आहे. शुक्रवार, २० नोव्हेंबर रोजी सकाळी ८ वाजल्यापासून मतमोजणीला सुरुवात झाली. दुपारी १२:४६ वाजेपर्यंत जाहीर झालेल्या निकालांनुसार, पंचायत समितीच्या ६४५ जागांपैकी काँग्रेसने ३१३ जागा जिंकल्या आहेत. तर भाजपला २१४ जागांवर विजय मिळाला आहे. राष्ट्रीय लोकतांत्रिक पक्षाला (आरएलपी) ३३ जागा मिळाल्या आहेत.
इतर पक्ष आणि अपक्षांचाही प्रभाव
जाहीर झालेल्या निकालांमध्ये मार्क्सवादी कम्युनिस्ट पक्षाला (सीपीआयएम) १४, बहुजन समाज पक्षाला (बसप) ९ आणि भारत आदिवासी पक्षाला (बीएपी) ५ जागा मिळाल्या आहेत. तर अपक्ष उमेदवारांनी ५७ जागांवर विजय मिळवला आहे. यावरून ग्रामीण भागातील निवडणुकांमध्ये काँग्रेसने भाजपपेक्षा अधिक जागा जिंकल्या असल्याचे स्पष्ट झाले आहे. मात्र, ही आकडेवारी मतमोजणी सुरू असतानाची असून अंतिम निकालांमध्ये बदल होऊ शकतो.
जयपूरसह ३७ जिल्ह्यांत मतमोजणी
राजस्थानमधील ४१ जिल्ह्यांमध्ये जिल्हा परिषद आणि पंचायत समिती सदस्यांच्या निवडणुका चार टप्प्यांत घेण्यात आल्या. २२ आणि २८ ऑक्टोबर तसेच ३ आणि १४ नोव्हेंबर रोजी मतदान झाले. या निवडणुकांमध्ये एकूण १ हजार ४०३ जिल्हा परिषद आणि ८ हजार २४५ पंचायत समिती जागांसाठी मतदान झाले. त्यापैकी ३७ जिल्ह्यांतील १ हजार २७५ जिल्हा परिषद आणि ७ हजार ५४३ पंचायत समिती जागांची मतमोजणी २० नोव्हेंबर रोजी सुरू आहे.
चार जिल्ह्यांतील मतमोजणी १७ डिसेंबरला
कोटा, बारां, श्रीगंगानगर आणि करौली या चार जिल्ह्यांतील मतमोजणी पुढे ढकलण्यात आली आहे. या जिल्ह्यांतील विद्यमान जिल्हा परिषद आणि पंचायत समित्यांचा कार्यकाळ डिसेंबरमध्ये संपत असल्याने हा निर्णय घेण्यात आला आहे. या चार जिल्ह्यांतील मतमोजणी १७ डिसेंबर रोजी होणार आहे.
दरम्यान, राज्य निवडणूक आयोगाने यापूर्वीच ३७ पंचायत समिती सदस्य आणि ४ जिल्हा परिषद सदस्यांची बिनविरोध निवड जाहीर केली आहे. मतमोजणीनंतर निवडून आलेले सदस्य जिल्हा परिषद आणि पंचायत समित्यांचे नेतृत्व निवडतील. राजस्थानच्या ग्रामीण राजकारणात या निवडणुकांचे निकाल महत्त्वाचे मानले जात आहेत.





