Gunaratna Sadavarte : अॅड गुणरत्न सदावर्ते हे त्यांनी केलेल्या विधानांमुळे चर्चेच्या केंद्रस्थानी असतात. अनेकदा त्यांची विधाने वादही निर्माण करतात. गेल्या काही दिवसांत आगामी स्थानिक स्वराज्य संस्थांचा निवडणुकांच्या पार्श्वभूमीवर राजकीय वातावरण तापले आहे.

विरोधकांकडून मतदार याद्यांमध्ये घोळ होत असल्याचा आरोप केला जात आहे. या पार्श्वभूमीवर नुकतीच सर्वपक्षीय शिष्टमंडळाने राज्य निवडणूक अधिकाऱ्यांची भेट घेतली होती. यानंतर आयोजित पत्रकार परिषदेत मनसे प्रमुख राज ठाकरे यांनी अजित पवार यांची मिमिक्री केली होती. आता यावरून अॅड गुणरत्न सदावर्ते यांनी राज ठाकरेंवर टीका केली आहे.

राज ठाकरे हे राजकारणातील नापास माणूस आहेत. अजित पवार यांच्या राजकीय वजनाच्या पायाच्या धुळीप्रमाणे राज ठाकरे आहेत, अशी टीका करत सदावर्तेंनी राज ठाकरेंना डिवचण्याचा प्रयत्न केला आहे. मिमिक्री करून मते मिळत नाहीत, असा टोलाही त्यांनी राज ठाकरेंनी लगावला आहे. तर अजित पवार आणि एकनाथ शिंदे यांच्यावर स्तुतीस्तुमने उधळली आहेत. सर्वात महत्वाचे म्हणजे यावेळी बोलताना सदावर्ते यांनी केलेल्या एका विधानामुळे मोठा वाद निर्माण होण्याची शक्यता आहे.

नथुराम गोडसे यांच्या विचारांशी आपला डीएनए 

त्यामुळे राज ठाकरे यांच्यावर केलेल्या टीकेला मनसेकडून काय प्रत्युत्तर दिले जाते हे पाहणे महत्वाचे असणार आहे. पुढे बोलताना गुणरत्न सदावर्ते म्हणाले नथुराम गोडसे यांच्या विचारांशी आपला डीएनए आहे. या विधानावरून मोठा वाद होण्याची शक्यता आहे. पंडीत नथुराम गोडसे यांच्या विचारांसाठी आनंद दिघे कोर्टात लढले होते, असे ते म्हणाले.

 नवा वाद होण्याची शक्यता 

त्यामुळेच आनंद दिघे, एकनाथ शिंदे आणि आमचा डीएनए एक आहे. पंडीत नथुराम गोडसे यांच्या विचारांसाठी आनंद दिघे लढले होते. दिघे यांच्या विचारांचे एकनाथ शिंदे आणि मी आहे असे सदावर्ते म्हणाले आहेत. या विधानामुळे नवा वाद होण्याची शक्यता आहे.

हेही वाचा : पाकिस्तान-अफगाणिस्तान तात्काळ युद्धबंदीसाठी तयार ; दोहा बैठकीनंतर कतारमध्ये घोषणा