नवी दिल्ली- आपल्या देशामध्ये वाहतूक नियमांतर्गत कार, बस, बाईक आणि ट्रक चालवण्यासाठी प्रत्येकाकडे ड्रायव्हिंग लायसन्स असणे आवश्यक आहे. तसेच लायसन्सशिवाय वाहन चालवणे हा कायद्याने गुन्हा देखील आहे. पण तुम्हाला कधी रेल्वे चालवण्यासाठी ड्रायव्हिंग लायसन्स ची आवश्यकता असते का? असा प्रश्न पडलाय का? जर पडला असेल तर त्याचे उत्तर ‘नाही’ असे आहे.

अशी आहे लोकोपायलट निवडण्याची पद्धत –

रेल्वे चालवण्यासाठी भारतीय रेल्वे बोर्डाकडून ‘असिस्टंट लोको पायलट’ या पदासाठी भरती प्रक्रिया राबवली जाते. त्यासाठी सर्वप्रथम उमेदवाराची लेखी परीक्षा, मुलाखत आणि वैद्यकीय चाचणी घेऊन निवडप्रक्रिया केली जाते. नंतर निवड झालेल्या उमेदवारास प्रशिक्षण शाळेत पाठवले जाते. प्रशिक्षणादरम्यान रेल्वेचे इंजिन, रेल्वे ट्रॅक आणि डब्यांची संपूर्ण माहिती दिली जाते. त्यानंतर रेल्वे इंजिन चालवण्याचे प्रशिक्षण दिले जाते. संपूर्ण प्रशिक्षण कालावधी पूर्ण झाल्यानंतर उमेदवारांची अंतिम परीक्षा घेतली जाते. व उत्तीर्ण झालेल्यांना योग्यता प्रमाणपत्र दिले जाते. त्यानंतरच उमेदवारांना रेल्वे चालवण्याची संधी दिली जाते.

सर्वात आधी मालगाडी चालवण्याची दिली जाते परवानगी –

प्रवाशांची सुरक्षितता लक्षात घेता उमेदवारास लगेच पॅसेंजर रेल्वे चालवण्यास परवानगी दिली जात नाही. त्याला सर्वप्रथम माल गाडी चालण्याची परवानगी दिली जाते. उमेदवारास त्याबाबतचा संपूर्ण अनुभव आल्यानंतरच स्वतंत्रपणे पॅसेंजर रेल्वे चालवण्यास परवानगी दिली जाते.