Railway Stocks:  शेअर बाजारात मंगळवारी रेल्वे क्षेत्रातील कंपन्यांच्या शेअर्सनी जबरदस्त झेप घेतली. IRCON इंटरनॅशनल लिमिटेड, रेल विकास निगम लिमिटेड (RVNL) आणि रेलटेल कॉर्पोरेशन ऑफ इंडिया या सरकारी कंपन्यांच्या शेअर्समध्ये 7 टक्क्यांपर्यंत वाढ नोंदवण्यात आली. या तेजीमागे केंद्र सरकारचा एक मोठा निर्णय कारणीभूत ठरला आहे.

प्रधानमंत्री नरेंद्र मोदी यांच्या अध्यक्षतेखाली मंगळवार, 7 ऑक्टोबर रोजी झालेल्या मंत्रिमंडळाच्या बैठकीत अंदाजे ₹24,634 कोटींच्या चार मल्टी-ट्रॅक रेल्वे प्रकल्पांना मंजुरी देण्यात आली. रेल्वेमंत्री अश्विनी वैष्णव यांनी सांगितले की, हे प्रकल्प महाराष्ट्र, मध्य प्रदेश, गुजरात आणि छत्तीसगड या राज्यांतील 18 जिल्ह्यांत राबवले जाणार असून, देशाच्या विद्यमान रेल्वे नेटवर्कमध्ये सुमारे 894 किलोमीटरची वाढ होईल.

मंजूर झालेले प्रमुख प्रकल्प असे —

भुसावळ – वर्धा तिसरी व चौथी लाईन (₹9,197 कोटी)

गोंदिया – डोंगरगढ चौथी लाईन (₹2,223 कोटी)

वडोदरा – रतलाम तिसरी व चौथी लाईन (₹8,885 कोटी)

इटारसी – भोपाल – बीना चौथी लाईन (₹4,329 कोटी)

या प्रकल्पांमध्ये IRCON, RVNL आणि RailTel यांसारख्या सरकारी कंपन्यांचा महत्त्वाचा वाटा आहे. या कंपन्या रेल्वे इन्फ्रास्ट्रक्चरच्या बांधकाम आणि पुरवठ्याचे काम करतात. या घोषणेनंतर IRCON चा शेअर 7% वाढून ₹184.4 वर पोहोचला, तर RVNL चा शेअर 2.6% वाढून ₹355.6 वर बंद झाला. RailTel चा शेअर 3.5% वाढून ₹398.2 वर स्थिरावला.

इतर रेल्वे शेअर्समध्येही वाढ –

Texmaco Rail & Engineering Ltd चा शेअर 2.05% वाढून ₹142.55 वर बंद झाला. या शेअरमध्ये गेल्या वर्षभरात सुमारे 24.5% घट झाली होती.
Titagarh Rail Systems Ltd च्या शेअरमध्ये 3.33% वाढ झाली असून तो ₹928.80 वर बंद झाला. मात्र या वर्षात तो अद्याप 16.2% नी खाली आहे.

(सूचना: वरील माहिती फक्त माहितीपर उद्देशाने दिली आहे. शेअर बाजारात गुंतवणूक करताना जोखीम असते. गुंतवणुकीचा निर्णय घेण्यापूर्वी नेहमी तज्ज्ञांचा सल्ला घ्या. दैनिक प्रभात कोणत्याही गुंतवणुकीची शिफारस करत नाही.)