Zilla Parishad Politics : रायगड जिल्हा परिषदेत सत्तासमीकरणाचा पेच अखेर सुटल्याची चर्चा रंगली आहे. राज्यात महायुतीत एकत्र असलेले पक्ष स्थानिक पातळीवर मात्र वेगळ्या रेषा आखताना दिसत आहेत. भाजपने शिंदेसेनेला बाजूला सारत अजितदादांच्या राष्ट्रवादीशी हातमिळवणी केल्याची माहिती सूत्रांकडून समोर येत आहे. विधानभवन परिसरात भाजप प्रदेशाध्यक्ष रवींद्र चव्हाण, शिंदेसेनेचे मंत्री उदय सामंत आणि भारत गोगावले यांच्यात चर्चा झाल्याची माहिती आहे. मात्र या चर्चेनंतरही शिंदेसेनेच्या बाजूने समीकरण झुकले नाही, अशी चर्चा आहे. सूत्रांच्या माहितीनुसार, जिल्हा परिषदेत भाजपचा अध्यक्ष आणि राष्ट्रवादीचा उपाध्यक्ष बसण्याची शक्यता वर्तवली जात आहे. स्थानिक संघर्षाचा परिणाम? रायगडमध्ये मंत्री भरत गोगावले आणि तटकरे समर्थकांमध्ये यापूर्वीही राजकीय संघर्ष उफाळून आला होता. त्यामुळे जिल्हा परिषद निकालानंतर भाजपने राष्ट्रवादीकडे झुकताच शिंदेसेनेची कोंडी झाल्याचं चित्र आहे. महायुतीसमोर प्रश्नचिन्ह? राज्यात एकत्र सत्तेत असलेले पक्ष जिल्हा परिषद पातळीवर आमनेसामने येत असतील, तर हा नवा पॅटर्न महायुतीसाठी भविष्यात धोक्याची घंटा ठरणार का? रायगडमधील ही ठिणगी पुढे मोठा राजकीय वादळ निर्माण करेल का? याकडे राज्याच्या राजकीय वर्तुळाचं लक्ष लागलं आहे. रायगड जिल्हा परिषदेत पक्षीय बलाबल शिंदेसेना – 21 अजित पवार गट राष्ट्रवादी – 16 भाजप – 15 ठाकरेसेना – 5 काँग्रेस – 2 बहुमतासाठी 30 जागांची गरज आहे. भाजप (15) आणि राष्ट्रवादी (16) एकत्र आल्यास एकूण संख्या 31 होते. त्यामुळे सत्तास्थापनेसाठी आवश्यक बहुमत सहज मिळते.