Hapus Mango : आता हिवाळ्यात रस-पोळीचा बेत; हापूस आंबे बाजारात दाखल, 1 डझन कितीला?
Hapus Mango : रायगडमधील डॉ. संदेश पाटील यांच्या बागेतील हापूस आंब्याच्या ९ पेट्या वाशी मार्केटमध्ये विक्रीसाठी रवाना. प्रत्येक पेटीत दोन डझन आंबे.

Hapus Mango : हिवाळ्यात रस-पोळीचा आनंद घेता येणार आहे. रत्नागिरी आणि सिंधुदुर्गच्या हापूसप्रमाणेच आता रायगडचा हापूस आंबाही मोठ्या बाजारपेठेत आपली ओळख निर्माण करू लागला आहे. यंदा ऑक्टोबर महिन्यातच रत्नागिरी आणि सिंधुदुर्गचा हापूस बाजारात दाखल झाला. रत्नागिरीच्या चार डझनांच्या पहिल्या पेटीला सुमारे २१ हजार रुपये, तर देवगडच्या साडेसहा डझनांच्या पेटीला ३६ हजार रुपये मिळाला होता.
दरम्यान, रायगडमधील आंबा उत्पादक डॉ. संदेश पाटील यांच्या बागेतील हापूसच्या ९ पेट्या १७ नोव्हेंबर रोजी वाशी मार्केटमध्ये विक्रीसाठी रवाना करण्यात आल्या. प्रत्येक पेटीत दोन डझन म्हणजेच एकूण २१६ आंबे आहेत. रायगडच्या हापूसची चव आणि गुणवत्ता रत्नागिरी व सिंधुदुर्गच्या हापूसपेक्षा कमी नाही, असा विश्वास डॉ. पाटील यांनी व्यक्त केला. आधुनिक शेती पद्धती आणि गुणवत्तेवर भर दिल्यास रायगडचा हापूस राज्यासह देशभरात वेगळी ओळख निर्माण करेल, अशी अपेक्षा त्यांनी व्यक्त केली.





