नागपूर : महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळ (बालभारती) यांच्या अधिकाऱ्यांनी बुधवारी नागपूर येथील एका प्रिंटिंग प्रेसवर छापा टाकून हजारो पाठ्यपुस्तके बेकायदेशीरपणे छापली जात असल्याचे उघड केले. हिंगणा एमआयडीसी परिसरातील दिगडोह येथील प्रतिभा प्रिंटिंग प्रेसमध्ये बनावट पुस्तके छापली जात असल्याची माहिती मिळाल्यानंतर ही कारवाई करण्यात आली.

बालभारतीचे उत्पादन अधिकारी राजेश पोटदुखे यांनी सांगितले की, छाप्यात सुमारे दहा ते वीस हजार बेकायदेशीर पुस्तके आढळून आली. मात्र, नागपूर येथील बालभारती विक्री भांडाराचे व्यवस्थापक दिलीप विटकर यांनी ही संख्या वीस ते तीस हजारांदरम्यान असल्याचा अंदाज व्यक्त केला.

या प्रकरणी तपास सुरू असून संबंधितांविरोधात तक्रार दाखल करण्यात येणार असल्याचे अधिकाऱ्यांनी सांगितले. बालभारती ही राज्य सरकारची स्वायत्त संस्था असून इयत्ता १ ते १२ पर्यंतच्या राज्य मंडळाच्या शाळांसाठी विविध माध्यमांतील पाठ्यपुस्तके आणि शैक्षणिक साहित्य तयार व प्रकाशित करण्याची जबाबदारी तिच्याकडे आहे.

पाठ्यपुस्तकांची अनधिकृत छपाई झाल्याचा प्रकार लक्षात येताच पोलिसांच्या मदतीने त्वरित कारवाई करण्यात आली असून संबंधितांवर गुन्हा नोंदविण्यात आला आहे. भविष्यात असे प्रकार निदर्शनास आल्यास बालभारतीकडून कडक कारवाई करण्यात येईल.
– अनुराधा ओक, संचालक, बालभारती