Rahuri Byelection : राज्यातील विधानसभा पोटनिवडणुकांच्या पार्श्वभूमीवर अर्ज माघारीच्या शेवटच्या दिवशी महत्त्वाच्या राजकीय घडामोडी घडल्या. बारामतीमध्ये काँग्रेसने अखेरच्या क्षणी माघार घेतल्याने तेथील उत्सुकता काहीशी कमी झाली असली, तरी राहुरी मतदारसंघात मात्र लढत अधिक रंगतदार बनली आहे. येथे अनेक उमेदवारांनी माघार घेतल्यानंतर अखेर ७ उमेदवार निवडणुकीच्या रिंगणात कायम राहिले आहेत. राहुरीचे दिवंगत आमदार शिवाजीराव कर्डीले यांच्या निधनामुळे रिक्त झालेल्या जागेसाठी ही पोटनिवडणूक होत आहे. भाजप महायुतीने त्यांचे सुपुत्र अक्षय कर्डीले यांना उमेदवारी दिली आहे. सुरुवातीला राष्ट्रवादी काँग्रेस (शरद पवार गट) कडून प्राजक्त तनपुरे यांचे नाव चर्चेत होते; मात्र त्यांनी ऐनवेळी माघार घेतल्याने पक्षाने गोविंद मोकाटे यांना उमेदवारी दिली. भाजपकडून ही निवडणूक बिनविरोध करण्याचे प्रयत्न झाले होते. मात्र, सात उमेदवार कायम राहिल्याने आता मतदान होणार हे स्पष्ट झाले आहे. प्रमुख लढत भाजपचे अक्षय कर्डीले आणि राष्ट्रवादी (शरदचंद्र पवार) पक्षाचे गोविंद मोकाटे यांच्यात होण्याची शक्यता आहे. हेही वाचा – Stock Market: ‘या’ कारणांमुळे शेअर बाजार कोसळला; सेन्सेक्समध्ये 931 अंकांची घसरण याशिवाय वंचित बहुजन आघाडीकडून संतोष चोळके रिंगणात आहेत. शिवसेना (उद्धव बाळासाहेब ठाकरे) पक्षाचे माजी जिल्हाप्रमुख रावसाहेब खेवरे यांनी अपक्ष म्हणून उमेदवारी कायम ठेवत बंडखोरीचा झेंडा उंचावला आहे. रिंगणातील उमेदवार – अक्षय कर्डीले – भाजप महायुती गोविंद मोकाटे – राष्ट्रवादी (शरदचंद्र पवार) संतोष चोळके – वंचित बहुजन आघाडी अथर्व म्हसे – अपक्ष रावसाहेब खेवरे – अपक्ष सूर्यभान लांबे – अपक्ष महेश हापसे – अपक्ष बारामतीत 23 उमेदवार रिंगणात कायम – राहुरी सोबतच बारामती विधानसभा मतदार संघातही अजित पवार यांच्या निधनानंतर पोटनिवडणुक होत आहे. येथे बारामतीत एकूण 53 उमेदवारांचे अर्ज होते. यापैकी 30 उमेदवारांनी माघार घेतली असली तरी अद्याप 23 उमेदवार हे रिंगणात कायम आहेत. त्यामुळे बारामतीत बिनविरोध निवडणूक होणार नाही, हे स्पष्ट झाले आहे. मात्र आता काँग्रेस पक्षाच्या माघारीमुळे उपमुख्यमंत्री सुनेत्रा पवार यांचा विजयाचा मार्ग अधिक सुखकर झाला आहे. माघारीनंतरचे चित्र स्पष्ट झाल्याने आता राहुरीत कोण बाजी मारणार याकडे मतदारांचे लक्ष लागले आहे. या पोटनिवडणुकीसाठी 23 एप्रिलला मतदान होणार असून 4 मे रोजी निकाल जाहीर होणार आहेत.
