Rahul Gandhi : लोकसभेतील विरोधी पक्षनेते राहुल गांधी यांनी पुण्यातील ‘छात्रों की गूंज’ कार्यक्रमात विद्यार्थिनींशी संवाद साधला. यावेळी मांजरी येथे गेल्या काही दिवसांपासून उपोषण करणाऱ्या एका आदिवासी विद्यार्थिनीने राहुल गांधी यांची भेट घेत आपल्या मागण्यांचे निवेदन दिले. राहुल गांधी यांनी तिचे निवेदन स्वीकारून ते खिशात ठेवले आणि तिचं म्हणणं शांतपणे ऐकून घेतलं. (Rahul Gandhi)

‘१० दिवसांपासून उपोषण, मला सकाळपासून ताप’

विद्यार्थिनीने मराठीत आपल्या व्यथा मांडताना सांगितले की, ती आणि तिचे सहकारी गेल्या १० दिवसांपासून मांजरी येथे उपोषण करत आहेत. आदिवासी विद्यार्थ्यांना चांगले शिक्षण आणि मूलभूत सुविधा मिळाव्यात, यासाठी हे आंदोलन सुरू असल्याचं तिने सांगितलं. (Rahul Gandhi)

तिने दावा केला की, त्यांच्या मागण्यांसाठी प्रतिनिधी मंत्रालयात गेले होते. मात्र, संबंधित मंत्र्यांकडून ‘सॉरी, मी यावर काही करू शकत नाही; हे मुख्यमंत्र्यांच्या हातात आहे’ असं उत्तर मिळाल्याचं तिने सांगितलं. (Rahul Gandhi)

आश्रमशाळांमधील सुविधांवरही सवाल

आदिवासी आश्रमशाळांमध्ये सुरू असलेल्या सेंट्रल किचन पद्धतीवरही विद्यार्थिनीने प्रश्न उपस्थित केले. एका ठिकाणी तयार होणारं जेवण लांबच्या आश्रमशाळांमध्ये नेलं जात असल्याने अन्न खराब होण्याचा धोका असल्याचा दावा तिने केला. तिने गडचिरोलीतील आश्रमशाळेतील सर्पदंशाच्या घटनेचाही उल्लेख करत विद्यार्थ्यांच्या सुरक्षेचा प्रश्न उपस्थित केला. (Rahul Gandhi)

‘आदिवासी मुलींच्या हॉस्टेलमध्ये प्रेग्नन्सी टेस्ट का?’

यावेळी विद्यार्थिनीने आदिवासी मुलींच्या वसतिगृहांमधील नियमांबाबतही गंभीर प्रश्न उपस्थित केला. सुट्टीसाठी घरी गेल्यानंतर महिन्यापेक्षा अधिक काळाने परतणाऱ्या विद्यार्थिनींकडून फिटनेस प्रमाणपत्र मागितले जाते आणि त्यामध्ये गर्भधारणा चाचणी घेतली जात असल्याचा दावा तिने केला. याबाबत तिने राहुल गांधी यांच्यासमोर तीव्र नाराजी व्यक्त करत, वसतिगृहांमध्ये २४ तास नर्सची सुविधा उपलब्ध करून देण्याची मागणी केली. (Rahul Gandhi)

राहुल गांधींना उपोषणस्थळी येण्याचं निमंत्रण

विद्यार्थिनीच्या समस्या ऐकल्यानंतर राहुल गांधी यांनी ‘तुम्ही मला उपोषण सुरू असलेल्या ठिकाणी का निमंत्रित करत नाही?’ असा सवाल केल्याचं तिने सांगितलं. त्यावर विद्यार्थिनीने राहुल गांधींनी आंदोलनस्थळी यावं, अशी इच्छा व्यक्त केली. पुण्यातील या कार्यक्रमात विद्यार्थिनीने थेट मराठीत मांडलेल्या प्रश्नांमुळे आदिवासी विद्यार्थ्यांच्या शिक्षण, वसतिगृह आणि सुविधांशी संबंधित मुद्दे पुन्हा चर्चेत आले आहेत. (Rahul Gandhi)

Rahul Gandhi : पुण्यात आदिवासी विद्यार्थ्यांच्या सुरु असलेल्या उपोषणाला राहुल गांधी भेट देणार? विद्यार्थिनीने मांडली व्यथा