Rahul Gandhi : कॉंग्रेसचे नेते राहुल गांधी (Rahul Gandhi) यांनी शनिवारी केंद्र सरकारचे नेतृत्व करणाऱ्या भाजपवर जोरदार शाब्दिक हल्लाबोल केला. भारत आता लोकशाही देश राहिला नाही, असे परखड भाष्य त्यांनी केले. तेलंगणातील कॉंग्रेस सरकारने आयोजित केलेल्या भारत समिटमध्ये राहुल बोलत होते.

काही परदेशी प्रतिनिधींना हैदराबादमधील भारत समिटमध्ये सहभागी होता आले नाही. त्याबद्दल त्यांची माफी मागत राहुल (Rahul Gandhi) यांनी केंद्र सरकारला लक्ष्य केले. संबंधित परदेशी प्रतिनिधींना समिटमध्ये सहभागी होण्याची परवानगी केंद्र सरकारने दिली नाही. त्यावरून देशात काय स्थिती आहे याचा अंदाज लावता येऊ शकतो, असे ते म्हणाले.

देशात वर्ष २०१४ मध्ये कॉंग्रेसने पूर्ण नव्या प्रकारची निवडणूक अनुभवली. त्यावेळी राजकीय व्यवस्थेत प्रचंड प्रमाणात डॉलर्स ओतण्यात आले. तसेच, नव्या पद्धतीची प्रचार मोहीम राबवण्यात आली, अशी भूमिका त्यांनी मांडली. देशातील निवडणुकांच्या विश्‍वासार्हतेवर कॉंग्रेस आणि इतर विरोधी पक्ष सातत्याने प्रश्‍नचिन्ह उपस्थित करत आहेत. संबंधित मुद्दाही राहुल यांनी उपस्थित केला.

देशात वर्ष २०२४ मध्ये लोकसभा निवडणूक झाली. त्यावेळी मतदान करणाऱ्या १४ कोटी मतदारांना निवडणूक आयोगाने अवैध ठरवले. तसे असेल तर ती निवडणूक वैध कशी ठरवता येऊ शकेल, असा सवाल त्यांनी (Rahul Gandhi) केला.