नवी दिल्ली : कॉंग्रेसचे नेते राहुल गांधी यांच्या नागरिकत्वावर (Rahul Gandhi Citizenship) प्रश्नचिन्ह उपस्थित करणारी याचिका अलाहाबाद उच्च न्यायालयात दाखल करण्यात आली आहे. कर्नाटकमधील भाजपचा कार्यकर्ता असणाऱ्या त्या याचिकाकर्त्याचा जबाब मंगळवारी ईडीने नोंदवला. राहुल ब्रिटीश नागरिक (Rahul Gandhi Citizenship) असल्याचा दावा संबंधित याचिकेतून करण्यात आला आहे. ती याचिका भाजपचे कार्यकर्ते एस.विग्नेश शिशिर यांनी दाखल केली. त्यांना परकी चलन व्यवस्थापन कायद्यातील (फेमा) तरतुदींतर्गत ईडीने समन्स बजावले. त्यानुसार ते जबाब नोंदवण्यासाठी दिल्लीतील ईडीच्या कार्यालयात हजर राहिले. त्यांना राहुल यांच्या संदर्भात केलेल्या दाव्याशी संबंधित काही प्रश्न ईडीच्या अधिकाऱ्यांनी विचारले. शिशिर यांनी त्यांच्याकडे ब्रिटीश सरकारची काही कागदपत्रे, ईमेल्स असल्याचे याचिकेत नमूद केले आहे. संबंधित कागदपत्रे आणि ईमेल्सच्या आधारे राहुल ब्रिटीश नागरिक असल्याचे सिद्ध होते. त्यामुळे ते भारतात निवडणुका लढवण्यास अपात्र आहेत, अशी भूमिका याचिकेतून मांडण्यात आली आहे. ईडीने शिशिर यांना त्यांच्याकडील कागदपत्रे सादर करण्यास सांगितल्याचे समजते. शिशिर यांनी जून २०२४ मध्ये दाखल केलेल्या तक्रारीवरून सीबीआयने याआधीच तपास सुरू केला आहे. सीबीआयपुढेही ते याआधी अनेकवेळा हजर झाले. त्यांच्या याचिकेवर न्यायालयात पुढील सुनावणी ९ ऑक्टोबरला होणार आहे. याआधीच्या सुनावणीवेळी केंद्र सरकारनेही आपली बाजू मांडली. राहुल यांच्या कथित ब्रिटीश नागरिकत्वाविषयीचा तपशील ब्रिटन सरकारकडून मागवण्यात आला आहे, अशी माहिती केंद्र सरकारने न्यायालयात दिली.
