बुलढाणा : समाजा-समाजात आज दुही, विसंवाद आणि संघर्ष निर्माण झाला आहे, त्या पापाचे धनी शरद पवारच आहेत, अशी प्रखर टीका भाजप नेते आणि मंत्री राधाकृष्ण विखे पाटील यांनी केली आहे. मंत्री विखे पाटील आज बुलढाणा दौऱ्यावर असताना त्यांनी मराठा आरक्षण आणि ओबीसी आरक्षण संदर्भात सुरू असलेल्या वादावर भाष्य केले आहे.

सन १९९४ साली जर पवार साहेबांनी मराठा समाजाचा समावेश केला असता तर आजची परिस्थिती नसती. १९९४ साली शरद पवार मुख्यमंत्री असताना त्यांनी हे पाप करून ठेवले आहे. त्याचवेळी जर मराठा समाजाचा समावेश केला असता तर आज समाजात दुही, विसंवाद व संघर्ष राहिला नसता. या पापाचे धनी कोण? या प्रश्नाचे उत्तर सर्वांनी शरद पवार साहेबांना विचारायला हवे, असे राधाकृष्ण विखे पाटील यांनी म्हटले आहे.

मराठा आरक्षणाच्या जीआरवरुन सध्या ओबीसी समाज आक्रमक झाला असून उच्च न्यायालयातही याचिका दाखल करण्यात आल्या आहेत.यावेळी, मनोज जरांगे यांच्या सुरात सुर मिसळत त्यांनी थेट शरद पवार यांच्यावर प्रखर टीका केली आहे. सध्या हैदराबाद गॅझेटिअरनुसार ओबीसी बांधवांच्या आरक्षणाला कुठेही धक्का न लागता मराठा समाजाला आरक्षण देण्याचे काम सुरू आहे. नुकतेच सरकारने काढलेल्या 2 सप्टेंबर रोजीच्या शासन निर्णयाला स्थगिती देण्यास हायकोर्टाने नकार दिला आहे. त्यानंतर, ओबीसी नेत्यांनी सरकारविरुद्ध आक्रमक भूमिका घेतल्याचे दिसून आले आहे.