बेल्हे : जुन्नर तालुक्यातील आळे गावात पिसाळलेल्या कुत्र्याने धुमाकूळ घालत तब्बल १२ जणांना चावा घेतल्याची घटना समोर आली आहे. त्यांच्यावर पुणे व मंचर उपजिल्हा रुग्णालयात उपचार सुरू आहेत. त्यापैकी दोघांची प्रकृती गंभीर असून त्यांना पुणे वायसीएम रुग्णालयात हलवण्यात आले आहे. या घटनेमुळे गावात भीतीचे वातावरण निर्माण झाले असून, भटक्या कुत्र्यांचा तातडीने बंदोबस्त करण्याची मागणी होत आहे.

कुत्र्याच्या हल्ल्यात जखमी झालेल्या नागरिकांवर प्राथमिक आरोग्य केंद्र, आळे येथे प्राथमिक उपचार करण्यात आले. नागरिकांनी घाबरून न जाता सतर्कता बाळगावी, असे आवाहन करण्यात आले आहे.

विशेषतः लहान मुलांना घराबाहेर एकटे सोडणे टाळावे तसेच परिसरात भटक्या कुत्र्यांचा वावर आढळल्यास नागरिकांनी सावध राहावे. गावातील भटक्या कुत्र्यांचा बंदोबस्त करण्यासाठी संबंधित प्रशासनाने तातडीने उपाययोजना कराव्यात, अशी मागणी अमोल भुजबळ, दिगंबर घोडेकर यांनी केली आहे.

 

आळे गावातील १२ जणांना कुत्र्याने चावा घेतला असून त्यांच्यावर प्राथमिक उपचार करण्यात आले आहेत. त्यापैकी दहा जणांना मंचर येथील उपजिल्हा रुग्णालयात हलवण्यात आले असून दोघांची प्रकृती गंभीर असल्याने त्यांना पुणे येथील वायसीएम रुग्णालयात पाठवण्यात आले आहे.

डॉ.अमोल बांगर वैद्यकीय अधिकारी, प्राथमिक आरोग्य केंद्र आळे