R Sai Kishore 5 Wickets County Championship Gloucestershire Beat Derbyshire : इंग्लंडच्या काउंटी चॅम्पियनशिपमध्ये भारतीय फिरकीपटूंची चमकदार कामगिरी सुरूच आहे. भारताचा डावखुरा फिरकीपटू आर. साई किशोरच्या (R Sai Kishore) जादुई गोलंदाजीच्या जोरावर ग्लॉस्टरशायर संघाने डर्बीशायरचा २१३ धावांच्या महाकाय फरकाने फडशा पाडला. विजयासाठी मिळालेल्या ३१९ धावांच्या आव्हानाचा पाठलाग करताना डर्बीशायरचा संपूर्ण संघ अवघ्या १०५ धावांवर गारद झाला. साई किशोरने केवळ २० धावा देत ५ फलंदाजांना पॅव्हेलियनचा रस्ता दाखवला. विशेष म्हणजे, दुसऱ्या डावात डर्बीशायरचे सर्वच्या सर्व १० विकेट्स फिरकी गोलंदाजांनी घेतल्या.

पहिल्या डावात चुरस; जेम्स ब्रेसीचे ११३, तर ऑलिव्हर प्राईसचे ६ विकेट्स!

नाणेफेक जिंकून प्रथम फलंदाजी करणाऱ्या ग्लॉस्टरशायरची सुरुवात अत्यंत खराब झाली होती आणि अवघ्या ३७ धावांत त्यांचे ५ फलंदाज तंबूत परतले होते. मात्र, जेम्स ब्रेसीने एकाकी झुंज देत ११३ धावांची शतकी खेळी केली. विल्यम्सच्या ४२ आणि साई किशोरच्या उपयुक्त २० धावांमुळे ग्लॉस्टरशायरने पहिल्या डावात २३७ धावा केल्या. प्रत्युत्तरात डर्बीशायरने मोहम्मद नईमच्या ७१ धावांच्या जोरावर २७८ धावा करत ४१ धावांची आघाडी घेतली. ग्लॉस्टरशायरकडून ऑलिव्हर प्राईसने ६, तर साई किशोरने २ विकेट्स घेतल्या.

दुसऱ्या डावात ब्रेसी-हॅमंडचे वादळ; शतकी खेळीसह नवा इतिहास –

Sai Kishore picked a five wicket haul by conceding just 6 runs in 8 overs. 🤯 pic.twitter.com/IgVJ3cK6W2

— Mufaddal Vohra (@mufaddal_vohra) September 6, 2026

दुसऱ्या डावात ग्लॉस्टरशायरने डर्बीशायरच्या गोलंदाजांवर प्रतिहल्ला चढवला. माइल्स हॅमंड (११८) आणि यष्टिरक्षक जेम्स ब्रेसी (नाबाद १०४) यांनी झंझावाती शतके ठोकली, तर जो फिलिप्सने ६४ धावा जोडल्या. ग्लॉस्टरशायरने ५ बाद ३५९ धावांवर आपला डाव घोषित केला. यासह जेम्स ब्रेसीने एकाच सामन्याच्या दोन्ही डावांत शतके ठोकण्याचा विक्रम केला. १९१९ मध्ये हॅरी स्मिथनंतर अशी कामगिरी करणारा तो ग्लॉस्टरशायरचा पहिलाच यष्टिरक्षक बनला.

हेही वाचा – India vs Pakistan : क्रिकेटप्रेमींसाठी मोठी बातमी! भारत-पाक सामन्यांबाबत ICC चा मास्टरप्लॅन, दरवर्षी रंगणार मॅचेस

साई किशोरचा भेदक मारा; १०५ धावांवर डर्बीशायरचा उडवला धुव्वा!

Sai Kishore picked a five wicket haul by conceding just 6 runs in 8 overs. 🤯 pic.twitter.com/IgVJ3cK6W2

— Mufaddal Vohra (@mufaddal_vohra) September 6, 2026

३१९ धावांच्या आव्हानासमोर साई किशोरच्या अचूक फिरकीपुढे डर्बीशायरच्या फलंदाजांनी सपशेल नांगी टाकली. साई किशोरने भेदक मारा करत अवघ्या २० धावांच्या मोबदल्यात ५ मोहरे टिपून संघाच्या विजयावर शिक्कामोर्तब केले. मानव सुथारनंतर आता साई किशोरनेही लाल चेंडूवर इंग्लंडच्या भूमीवर आपली मोहोर उमटवली असून त्याच्या या शानदार कामगिरीमुळे काउंटी क्रिकेटमध्ये भारतीय फिरकीचा दबदबा पुन्हा एकदा सिद्ध झाला आहे.