Paris 2024 Olympics : भारतीय शटलर्स लक्ष्य सेन आणि पीव्ही सिंधू त्यांच्या ऑलिम्पिक तयारीचा भाग म्हणून अनुक्रमे फ्रान्स आणि जर्मनीमध्ये प्रशिक्षण घेतील. यासाठी क्रीडा मंत्रालयाने मान्यता दिली आहे. पीव्ही सिंधू आणि लक्ष्य सेन या दोघांनी गेल्या महिन्याच्या अखेरीस BWF ने प्रकाशित केलेल्या रेस टू पॅरिस क्रमवारीनुसार भारतासाठी पॅरिस 2024 ऑलिम्पिक कोटा मिळवला आहे.

पॅरिस 2024 ऑलिम्पिकपूर्वी, दोन वेळा ऑलिम्पिक पदक विजेती पीव्ही सिंधू जर्मनीमध्ये प्रशिक्षण घेणार आहे. खरं तर, युरोपमध्ये प्रशिक्षण घेण्याच्या तिच्या प्रस्तावाला युवा व्यवहार आणि क्रीडा मंत्रालयाच्या मिशन ऑलिम्पिक सेलने (एमओसी) गुरुवारी मान्यता दिली आहे.  जागतिक क्रमवारीत 15व्या क्रमांकावर असलेली सिंधू उन्हाळी खेळांसाठी (ग्रीष्मकालीन खेळ) पॅरिसला रवाना होण्यापूर्वी सारब्रुकन येथील हरमन-न्यूबर्गरस्पोर्ट्सक्यूलमध्ये तिच्या प्रशिक्षक आणि सपोर्ट स्टाफसोबत एक महिन्यापेक्षा जास्त काळ प्रशिक्षण घेईल.

पीव्ही सिंधू ऑलिम्पिकमध्ये सहभागी होण्याची ही तिसरी वेळ असेल. रिओ 2016 मध्ये रौप्य पदक जिंकल्यानंतर तिने टोकियो 2020 ऑलिम्पिकमध्ये कांस्यपदक जिंकले होते. भारतीय शटलर सिंधू, 28, चार महिन्यांच्या दुखापतीनंतर फेब्रुवारीमध्ये कोर्टवर परतली आणि या आठवड्यात मलेशिया मास्टर्स 2024 मध्ये भाग घेत आहे.

Malaysia Masters 2024 : पी.व्ही. सिंधूची उपांत्यपूर्व फेरीत धडक, मिश्र दुहेरीत मात्र भारताच्या पदरी निराशा..

दुसरीकडे, जागतिक क्रमवारीत 14व्या क्रमांकावर असणारा भारतीय शटलर लक्ष्य सेन हा पॅरिस येथे होणाऱ्या पुरुष एकेरीच्या बॅडमिंटन स्पर्धेत भारताचे प्रतिनिधित्व करणार आहे. तो ऑलिम्पिक खेळांपूर्वी फ्रान्समधील मार्सिले येथील हॅले डेस स्पोर्ट्स परमेन्स येथे 8 ते 21 जुलै या कालावधीत त्याच्या प्रशिक्षक आणि सहाय्यक कर्मचाऱ्यांसह प्रशिक्षण घेईल.

विद्यमान राष्ट्रकुल चॅम्पियन लक्ष्य सेन पॅरिसमध्ये ऑलिम्पिकमध्ये पदार्पण करणार आहे. 2023 मध्ये तो फॉर्मसाठी झगडत होता पण यावर्षी ऑल इंग्लंड ओपन आणि फ्रेंच ओपनच्या उपांत्य फेरीत पोहोचण्यात यशस्वी झाला.