Purandar News- माजी केंद्रीय कृषिमंत्री शरद पवार यांच्या पुरंदर तालुक्यातील दुष्काळ पाहणी दौऱ्यात चोरट्यांनी कार्यकर्त्यांचा खिसा मोकळा केला. ही घटना वाल्हे (ता. पुरंदर) येथे घडली. शेतकऱ्यांच्या भेटीसाठी आलेल्या पवारांच्या स्वागतासाठी जमलेल्या गर्दीचा फायदा घेत चोरट्यांनी कार्यकर्त्यांचे रोकड लुटली. दरम्यान, ग्रामपंचायतीच्या सीसीटीव्ही फुटेजच्या मदतीने संशयितांचा माग काढत कार्यकर्ते आणि पोलिसांनी चौघांना नीरा येथे पकडले.

हे चौघे माळशिरस परिसरातील सराईत असल्याची माहिती समोर आली. शरद पवार यांनी (दि.२) रोजी पुरंदर तालुक्यातील परिंचे, मांडकी, वाल्हे, राख आदी दुष्काळग्रस्त भागांचा दौरा करून शेतकऱ्यांशी संवाद साधला. वाल्हे येथे त्यांच्या स्वागतासाठी मोठी गर्दी जमली होती. गर्दीचा फायदा घेत चोरट्यांनी हात साफ केला. दौरा पुढे गेल्यानंतर माजी सरपंच अमोल शंकर खवले यांचे ५ हजार ८२० रुपये, तर राजेंद्र रोहिदास राऊत यांचे १९ हजार रुपये चोरीला गेल्याचे निदर्शनास आले.

अमोल खवले यांनी तातडीने ग्रामपंचायतीतील सीसीटीव्ही फुटेज तपासले. त्यात संशयित चोरटे हे शरद पवार यांच्या ताफ्यातील एका वाहनात बसल्याचे दिसले. फुटेजमधील माहिती ताफ्यातील कार्यकर्ते पुष्कराज जाधव, संदेश पवार, गणेश होले, श्रीपाद गुरव, सुभाष दुर्गाडे आदींसह कार्यकर्त्यांना पाठवली. कार्यकर्त्यांनी संशयित वाहनाचा माग काढण्यास सुरुवात केली.

वाहन ताफ्याबाहेर जाऊ नये, यासाठी कार्यकर्त्यांनी त्याच्या पुढे आणि मागे स्वतःची वाहने ठेवून सतर्कता दाखवली. दौऱ्याचा ताफा नीरा येथे पोहोचल्यानंतर स्थानिक कार्यकर्ते, पोलिसांनी संशयितांवर लक्ष ठेवले. यावेळी पुन्हा चोरीचा प्रयत्न करताना दोघांना नागरिक, पोलिसांनी पकडले. त्यांच्याकडून चोरीचा मुद्देमाल जप्त केला असून पुढील तपासासाठी त्यांना जेजुरी पोलिसांच्या ताब्यात दिले आहे.

वाहनांमुळे आरोपींचा माग
माजी सरपंच अमोल खवले म्हणाले, वाल्हे ग्रामपंचायतीचे सीसीटीव्ही फुटेजमुळे संशयितांचे चेहरे आणि त्यांनी प्रवास केलेल्या वाहनाची माहिती मिळाल्याने त्यांचा माग काढणे शक्य झाले. कार्यकर्त्यांच्या सतर्कतेमुळे दौऱ्यादरम्यान चोरीच्या घटनांतील संशयितांना पकडण्यात यश आले.