Congress Leader Death : हरियाणातील कुंडली परिसरात एक्सप्रेसवेवर झालेल्या भीषण अपघातात पंजाब काँग्रेसचे नेते खुशबाज सिंह जट्टाना यांचा मृत्यू झाला आहे. या अपघातात त्यांच्या चालक परमिंदर सिंह यांचाही जागीच मृत्यू झाला.

मिळालेल्या माहितीनुसार, कुंडली-गाझियाबाद-पलवल एक्सप्रेसवेवरून जात असताना जट्टाना यांच्या एसयूव्ही गाडीचे टायर पंक्चर झाले. त्यामुळे गाडी रस्त्याच्या कडेला उभी करून टायर बदलण्याचे काम सुरू होते. त्याचवेळी मागून आलेल्या भरधाव ट्रकने त्यांच्या वाहनाला जोरदार धडक दिली.

या भीषण धडकेत जट्टाना (वय ४५) आणि त्यांचे चालक जागीच ठार झाले, तर त्यांचा सुरक्षा रक्षक गंभीर जखमी झाला आहे. अपघातानंतर ट्रक चालक घटनास्थळावरून फरार झाला असून पोलिसांनी त्याच्याविरोधात गुन्हा दाखल केला आहे.

सीसीटीव्ही फुटेज आणि इतर माहितीच्या आधारे पोलिसांनी ट्रक चालकाची ओळख पटवली असून त्याच्या अटकेसाठी शोधमोहीम सुरू आहे. या प्रकरणाचा सखोल तपास सुरू असल्याची माहिती पोलिसांनी दिली.

खुशबाज सिंह जट्टाना यांनी काँग्रेसकडून २०१७ आणि २०२२ मध्ये विधानसभा निवडणूक लढवली होती. ते बठिंडा ग्रामीण जिल्हा काँग्रेसचे अध्यक्ष म्हणून कार्यरत होते.

त्यांच्या निधनामुळे पंजाब काँग्रेसमध्ये शोककळा पसरली आहे. प्रदेशाध्यक्ष अमरिंदर सिंह राजा यांनी दुःख व्यक्त करत “पक्षाने एक ऊर्जावान तरुण नेता गमावला,” असे म्हटले. तसेच विरोधी पक्षनेते प्रताप सिंह बाजवा यांनीही त्यांना श्रद्धांजली अर्पण केली आहे.