Puneet Rajkumar : कन्नड चित्रपटसृष्टीतील लोकप्रिय अभिनेता पुनीत राजकुमार याच्या निधनाला पाच वर्षांचा काळ लोटला असला तरी त्याच्या जाण्याचे दुःख आजही चाहत्यांच्या मनात कायम आहे. २९ ऑक्टोबर २०२१ रोजी वयाच्या अवघ्या ४६ व्या वर्षी अभिनेत्याने जगाचा अखेरचा निरोप घेतला. त्याच्या अचानक झालेल्या निधनाने संपूर्ण चित्रपटसृष्टीला मोठा धक्का बसला होता. आता त्याच्यावर उपचार करणारे डॉक्टर रमणा राव यांनी एका मुलाखतीत त्या दिवसाच्या आठवणी सांगितल्या असून, पुनीत याच्या मृत्यूचे नेमके कारण काय होते याविषयी मोठा खुलासा केला आहे.

मृत्यूच्या दिवशी नेमकं काय घडलं होतं?

डॉ. रमणा राव यांनी दिलेल्या माहितीनुसार, पुनीत राजकुमार याने त्या दिवशी नेहमीच्या व्यायामापेक्षा वेगळा सराव केला होता. त्याने सुमारे दीड तास किकबॉक्सिंग केल्याचे डॉक्टरांनी सांगितले. त्यानंतर पुनीत क्लिनिकमध्ये आला, तेव्हा त्याला प्रचंड घाम आला होता आणि तो खूप थकलेले दिसत होता. त्याची अवस्था पाहून डॉक्टरांना काहीतरी गंभीर समस्या असल्याचा संशय आला. त्यामुळे त्यांनी तातडीने पुनीतचा ईसीजी (ECG) केला. तपासणीत त्याच्या हृदयावर गंभीर ताण आल्याचे समोर आले.

रुग्णालयात पोहोचण्यापूर्वीच हृदयाचे ठोके थांबले

डॉक्टरांनी ईसीजी अहवाल तपासल्यानंतर तातडीने औषधोपचार सुरू केले आणि पुनीत रुग्णालयात नेण्याची व्यवस्था केली. त्या वेळी तो शुद्धीवर होता आणि बोलतही होता. डॉक्टरांनी त्याला पत्नी अश्विनी यांच्या मांडीवर डोके ठेवून विश्रांती घेण्याचा सल्ला दिला होता.

मात्र, रुग्णालयात पोहोचण्याच्या अवघ्या काही क्षण आधी त्याच्या हृदयाचे ठोके थांबले. डॅाक्टरांनी अभिनेत्याचा जीव वाचण्यासाठी शर्तीचे  प्रयत्न केले. मात्र, त्यांना यश आले नाही.

पुनीत राजकुमार याच्याशी डॉक्टरांचे होते जवळचे नाते

डॉ. रमणा राव यांनी पुनीत राजकुमार याच्याशी असलेल्या जवळच्या नात्याचाही उल्लेख केला. त्यांनी पुनीत यांना आपल्या मुलाप्रमाणे मानले होते. आपल्या कारकिर्दीत अनेक कठीण प्रसंग पाहिले असले, तरी पुनीत यांना गमावणे हे आपल्यासाठी वैयक्तिक दुःख असल्याचे डॉक्टरांनी सांगितले.

आजही चाहत्यांच्या मनात जिवंत आहे ‘अप्पू’

पुनीत राजकुमार हा केवळ लोकप्रिय अभिनेता नव्हता, तर त्याच्या साधेपणासाठी आणि सामाजिक कार्यासाठीही ओळखला जात होता. त्याच्या निधनाची बातमी समजल्यानंतर चाहत्यांनी मोठ्या संख्येने गर्दी उसळली होती. श्री कांतिरवा स्टेडियम परिसरात जमलेला जनसमुदाय त्याच्या लोकप्रियतेची साक्ष देत होता. ‘अप्पू’ या नावाने चाहत्यांच्या मनावर अधिराज्य गाजवणाऱ्या पुनीत राजकुमार याच्या आठवणी आजही कायम आहेत.

Sanjay Raut : “रागाच्या भरात एखादा शब्द चुकीचा निघाला असेल, तरी…”; संजय राऊतांनी सर्वोच्च न्यायालयाची मागितली माफी, नेमकं प्रकरण काय?