Pune ZP Election 2026 – महापालिका निवडणुकीत मतदान यंत्र आणि कंट्रोल युनिट बंद पडण्याच्या हजारांहून अधिक तक्रारी आल्यानंतर राज्य निवडणूक आयोगाने जिल्हा परिषद निवडणुकीसाठी मतदान यंत्रांची उपलब्धता दोन पटीऐवजी चारपट केली आहे. त्यानुसार जिल्हा परिषद निवडणुकीसाठी ३ हजार ६०५ मतदान केंद्र असून यासाठी १४ हजारांहून अधिक मतदान यंत्रे उपलब्ध करून देण्यात आली आहेत. जिल्हा परिषद निवडणुकीसाठी ५ फेब्रुवारीला मतदान होत आहे. नगरपरिषदा व त्यानंतर झालेल्या महापालिकेच्या निवडणुकीत मतदान यंत्र अर्थात ईव्हीएम व कंट्रोल युनिट बंद पडण्याच्या अनेक घटना घडल्या. त्यामुळे अनेक मतदान केंद्रांवर अर्धा तास ते एक तास मतदान प्रक्रिया खोळंबली होती. यंत्रांची उपलब्धता कमी असल्याने मतदान यंत्रे बदलविण्यासाठी मोठा काळ गेला. त्यामुळे मतदान केंद्रांवर मतदारांच्या मोठ्या रांगा दिसून आल्या. त्याचा फटका साडेपाचनंतरही अनेक मतदान केंद्रांवर रांगा लागल्याचे चित्र नगरपरिषदा क्षेत्रामध्ये तसेच महापालिकेच्या निवडणुकीत दिसून आले. त्याची गंभीर दखल घेत राज्य निवडणूक आयोगाने जिल्हा परिषदेच्या निवडणुकीसाठी मतदान यंत्रांची उपलब्धता चारपटीने करण्याचा निर्णय घेतला आहे.राज्य निवडणूक आयोगाच्या पूर्वीच्या निर्देशानुसार मतदान यंत्रांच्या संख्येनुसार २२० टक्के अर्थात दुपटीहून अधिक यंत्रे उपलब्ध करून देण्याचा निर्णय घेतला होता. त्यानुसार ३ हजार ६०५ मतदान केंद्रांवर ७ हजार ९३१ मतदान यंत्र व ३ हजार ९६६ कंट्रोल युनिट देण्यात आले होते. मतदान प्रक्रिया सुरू असताना यंत्रे व कंट्रोल युनिट बंद पडल्यानंतर तातडीने बदलण्यासाठी आता जिल्ह्यातील ३ हजार ६०५ मतदान केंद्रांवर १४ हजार ४० मतदान यंत्र व ५ हजार ८१३ कंट्रोल युनिट देण्याचा निर्णय घेण्यात आला आहे.
