Pune weather : मागील दहा दिवसांपासून शहरासह जिल्ह्यातील वाढता उष्णतेचा पारा मंगळवारी (दि. १०) काहीसा घटला. एक ते दीड अंशाने कमाल तापमानात घट झाल्यामुळे उन्हाचा चटका कमी झाला असून, दुपारनंतर उपनगरांतील काही भागात ढगाळ वातावरणामुळे उन्हाच्या चटक्यापासून दिलासा मिळाला. मात्र, उकाडा चांगलाच वाढला आहे. गेल्या २४ तासात कमाल व किमान तापमानात घट झाली आहे. ३९ अंशांवर पोहोचलेला उष्णतेचा पारा आज ३७ अंशांपर्यंत खाली आला. परिणामी अन्य परिसरातही पारा एक ते दोन अंशाने घटला. मंगळवारी लोहगाव येथे सर्वाधिक ३७.८, एनडीए येथे ३७.३, वडगावशेरी ३६.७, चिंचवडला ३६ तर शिवाजीनगर येथे ३५.८ अंशसेल्सिअस कमाल तापमानाची नोंद झाली. मागील आठ ते दहा दिवसांपासून सातत्याने कमाल तापमानात वाढ होत असल्याने ३० अंशांपर्यंत खाली आलेले कमाल तापमान ३९ अंशांवर जाऊन पोहोचले. मार्च महिन्याच्या पहिल्याच आठवड्यात पारा ३५ अंशांनी पुढे गेला. गेल्या ४८ तासांत पारा चाळीशीच्या उंबरठ्यावर आल्यामुळे शहरात उन्हाच्या झळांनी पुणेकर घामाघूम झाले. आज दिवसभर कमाल तापमानात वाढ होण्याएवजी घट झाली. पुढील दोन दिवस शहरासह जिल्ह्यातील हवामान कोरडे राहील, कमाल व किमान तापमानात फारसा बदल होणार नाही. शहरासह जिल्ह्यातील कमाल तापमान लोहगाव ३७.८, एनडीए ३७.३, वडगावशेरी ३६.७, पुरंदर ३६.६, चिंचवड ३६, शिवाजीनगर ३५.८, मगरपट्टा ३५.७, हडपसर ३५.६, पाषाण आणि बारामती ३५.२, नारायणगाव ३४.४, शिरूर ३३.६ अंश सेल्सिअस.
