प्रभात वृत्तसेवा पुणे – शहरासह जिल्ह्यात थंडीचा पारा स्थिर असून, मागील चार दिवसांपासून सुरू झालेल्या कडाक्याच्या थंडीने पुणेकर गारठले आहेत. शुक्रवारी (दि. १२) पाषाण येथे सर्वात कमी ७.७ अंश सेल्सिअस किमान तापमानाची नोंद झाली. जिल्ह्यातील किमान तापमानात एक अंशाने वाढ झाली असली तरी थंडीचा कडाका कायम असून, बारामती येथे आज ८.१ अंश सेल्सिअस किमान तापमान नोंदविले. मागील चार ते पाच दिवसांपासून शहरातील किमान तापमान झपाट्याने घट झाल्यामुळे थंडीची लाट आली आहे. किमान तापमान पुन्हा ७ अंशापर्यंत खाली गेल्यामुळे हुडहुडी भरवणाऱ्या थंडीचा सध्या पुणेकर अनुभव घेत आहेत. पहाटे धुके आणि थंडीचा चांगला जोर जाणवत आहे. दुपारी उन्हाने थंडीपासून काहीसा दिलासा मिळत आहे. संध्याकाळी पाच वाजल्यापासूनच थंडीला सुरवात होत आहे. जिल्ह्यातील डोंगरभाग आणि धरणक्षेत्र परिसरात धुके पसरल्याचे दिसून येते. गेल्या २४ तासात शहरातील किमान तापमानात फारसा बदल झालेला नाही. त्यामुळे थंडीचा जोर कायम असून, पुढील दोन ते तीन दिवस शहरासह जिल्ह्यात हवामान कोरडे राहील. किमान तापमानात काही अंशी घट होईल, तर थंडीचा जोर कायम राहण्याचा अंदाज पुणे वेधशाळेने वर्तविला आहे. आजचे किमान तापमान पाषाण ७.७, शिवाजीनगर ८.३, कोरेगाव पार्क १२.८, चिंचवड १३.९, वडगावशेरी १४.८, मगरपट्टा १५.४, बारामती- माळीण ८.१, दौंड-तळेगाव ८.४,आंबेगाव ९.७, निमगिरी १०.७
