Pune Weather – शहरासह उपनगरांतील कमाल तापमानात दोन अंशाने वाढ झाल्याने उष्णतेचा पारा ३८ अंशाजवळ जाऊन पोहोचला. बुधवारी (दि. ४) लोहगाव येथे सर्वाधिक ३७.७, तर कोरेगाव पार्क येथे ३७.५ अंश सेल्सिअस कमाल तापमानाची नोंद झाली. त्यामुळे उन्हाच्या चटक्याने नागरिक चांगलेच घामाघूम झाले. अन्य परिसरातही पारा ३६ अंशांच्या जवळपास होता. मागील आठवड्यात कमाल व किमान तापमानात सतात्याने चढ- उतार होत असल्यामुळे ऊन, थंडी आणि ढगाळ वातावरणाचा लपंडाव पाहायला मिळाला. परिणामी आरोग्याच्या समस्या उद्भवू लागल्या. मात्र, गेल्या ४८ तासांत कमाल व किमान तापमानात लक्षणीय वाढ झाली असून, १० ते ११ अंशांपर्यंत खाली आलेले किमान तापमान १५ ते १६ अंशांवर पोहोचले. ३२ ते ३३ अंशांवरील कमाल तापमान आज ३८ अंशांपर्यंत पोहोचले. विशेषत: लोहगाव, कोरेगाव पार्क, दापोडी, शिवाजीनगर, हडपसर, वडगावशेरी आणि मगरपट्टा परिसरात तापमान वाढले आहे. सकाळी अकरा वाजल्यापासूनच उन्हाचा चटका जाणवत असून, रात्री उकाडा जाणवत आहे. दरम्यान, पुढील दोन दिवस शहरासह जिल्ह्यातील आकाश निरभ्र राहील, कमाल व किमान तापमानात वाढ होऊन उन्हाचा चटका वाढण्याचा अंदाज पुणे वेधशाळेने वर्तविला आहे. शहरासह जिल्ह्यातील कमाल तापमान लोहगाव ३७.७, कोरेगाव पार्क ३७.५, दापोडी ३५.९, शिवाजीनगर ३५.८, चिंचवड ३५.७, हडपसर ३५.६, वडगावशेरी ३५.४, मगरपट्टा ३५.२, पुरंदर ३४.९, हवेली ३४.२, भोर ३२.९, स्शिरूर ३२.६ अंश सेल्सिअस.
