Pune Water Cut – शहरातील पाणीकपात आजपासून सुरू होणार आहे. ५० टक्के शहराला सम आणि ५० टक्के शहराला विषम तारखांना होणार आहे. त्याचे वेळापत्रक याआधीच महापालिकेने जाहीर केले आहे. पाण्याची उपलब्धता कमी असल्याने नागरिकांनी पाण्याचा वापर काटकसरीने करावा, असे आवाहन महापालिकेतर्फे करण्यात आले आहे. खडकवासला धरण साखळीमध्ये केवळ पाच टीएमसी पाणी शिल्लक आहे.

त्यापैकी महापालिकेसाठी तीन टीएमसी पाणी शिल्लक आहे. हा पाणीसाठा प्रत्यक्ष पाणी वाटपाच्या तुलनेत खूप कमी आहे. या पार्श्वभूमीवर पुणे शहराला पाणीपुरवठा करणाऱ्या खडकवासला धरण साखळी, भामा आसखेड धरण आणि पवना धरणांतील उपलब्ध जलसाठा, पाटबंधारे विभागाकडून प्राप्त सूचना, तसेच आगामी कालावधीतील पिण्याच्या पाण्याची उपलब्धता याबाबत महापालिकेमार्फत आढावा घेण्यात आला. त्यानंतरच एकदिवसाआड पाणीपुरवठ्याचा निर्णय घेण्यात आला आहे.

या निर्णयामध्ये ज्या भागात याआधीच एक दिवसाआड पाणीपुरवठा होतो. त्यांचे वेळापत्रक जैसे थेच ठेवले आहे, तसेच काही तांत्रिक अडचणींमुळे काही भागांमध्ये पाणीपुरवठा होऊ न शकल्यास ती दूर करून, लगेच किंवा पुढील दिवशी पाणीपुरवठा बंद दिवशीदेखील त्या भागाला पाणीपुरवठा करण्यात येईल, असे महापालिकेने स्पष्ट केले आहे.

नागरिकांनी विनाकारण पाण्याची साठवणूक करू नये, तसेच पाण्याचा अपव्ययही करू नये, घरगुती वापराबाबतही काटकसर करावी, असे आवाहन महापालिकेने केले आहे. याशिवाय वाॅशिंग सेंटर्स, जलतरण तलाव, बांधकामाच्या साइट्स याठिकाणचा पाण्याचा वापर बंद करण्याचे आदेश दिले आहेत.