Pune: वारजे भागात गोळीबार करणाऱ्या सराईत गुन्हेगाराला जीवाची पर्वा न करता पकडणाऱ्या दोन पोलीस अंमलदारांचा महाराष्ट्र दिनाचे औचित्य साधून विशेष सन्मान करण्यात आला. ‘महाराष्ट्र राज्य पोलीस मित्र’ संघटनेच्या वतीने पोलीस कॉन्स्टेबल अमित शेलार व निखिल तांगडे यांना सन्मानचिन्ह व शाल देऊन गौरविण्यात आले. प्रसंगावधान राखल्याने टळला मोठा अनर्थ – काही दिवसांपूर्वी वारजे येथील एका सलूनमध्ये हल्लेखोरांकडून गोळीबार सुरू होता. त्यावेळी परिसरात गस्त घालत असलेले कॉन्स्टेबल शेलार आणि तांगडे यांनी क्षणाचाही विलंब न लावता घटनास्थळी धाव घेतली. भरवस्तीत आणि गर्दीच्या वेळी हा प्रकार घडत असताना, स्वतःच्या प्राणाची आहुती देण्याची तयारी ठेवून या दोन्ही जवानांनी हल्लेखोरांवर झडप मारली आणि त्यांना शिताफीने ताब्यात घेतले. या धाडसामुळे परिसरात होणारी मोठी जीवितहानी टळली असून त्यांच्या या कामगिरीचे सर्वत्र कौतुक होत आहे. या गौरव सोहळ्याप्रसंगी वारजे पोलीस स्टेशनचे वरिष्ठ पोलीस निरीक्षक महेश बोळकोटगी आणि पोलीस मित्र संघटनेचे अध्यक्ष राजेंद्र कपोते उपस्थित होते. याशिवाय संघटनेचे पदाधिकारी मनीष सोनिग्रा, चैतन्य जगताप, आस्वाद पुरोहित, गौरी गंद्रे, उषा धुमाळे, अनुराधा पवार, हेमलता जैन व इतर कार्यकर्ते मोठ्या संख्येने उपस्थित होते. “पोलीस दलातील अशा कर्तव्यनिष्ठ कर्मचाऱ्यांमुळेच सर्वसामान्य नागरिक सुरक्षित आहेत. शेलार आणि तांगडे यांनी दाखवलेले शौर्य हे तरुण पोलिसांसाठी प्रेरणादायी आहे,” असे गौरवपर उद्गार संघटनेचे अध्यक्ष राजेंद्र कपोते यांनी यावेळी काढले.
