Pune Spa Raid : विमानतळ परिसरातील अहिल्यानगर रोडवरील सिटी स्पेस बिल्डिंगमधील ‘द रुटस् स्पा’ येथे स्पाच्या आडून सुरू असलेल्या वेश्याव्यवसायावर विमानतळ पोलिसांनी सोमवारी दुपारी साडेतीनच्या सुमारास छापा टाकला. या कारवाईदरम्यान पोलिसांना पाहून दोघेजण पहिल्या मजल्यावरील गॅलरीतून खाली उतरून पळण्याचा प्रयत्न करताना पडून जखमी झाले. जखमींमध्ये स्पा मॅनेजर हुसेन शेख याचा पाय मोडला असून एका महिलेच्या डोक्याला गंभीर दुखापत झाली आहे. दोघांवर ससून जनरल हॉस्पिटल येथे उपचार सुरू असल्याची माहिती पोलिस उपायुक्त सोमय मुंडे यांनी दिली. पोलिसांनी दिलेल्या माहितीनुसार, संबंधित स्पामध्ये वेश्याव्यवसाय सुरू असल्याची माहिती मिळाल्यानंतर बनावट ग्राहक पाठवून खात्री करण्यात आली. त्यानंतर वरिष्ठ पोलिस निरीक्षक गोविंद जाधव यांच्या पथकाने पंचासमक्ष कारवाई केली. काचेचा दरवाजा तोडून आत प्रवेश केल्यानंतर चार महिला व चार पुरुष आढळून आले. याप्रकरणी उशिरापर्यंत विमान नगर पोलीस ठाण्यात येथे गुन्हा दाखल करण्याचे काम सुरू होते. पुढील तपास सुरू आहे.
