मुंबई: माजी मंत्री एकनाथ खडसे यांचे जावई डॉ. प्रांजल खेवलकर आणि इतर सात जणांच्या पुणे पोलिसांनी केलेल्या अटकेप्रकरणी ज्येष्ठ वकील अॅड. असीम सरोदे यांनी गंभीर आरोप केले आहेत. पुणे पोलिसांनी खासगी पार्टीला रेव्ह पार्टीचे स्वरूप देऊन कोकेनचा पुरावा ‘प्लँट’ केल्याचा दावा त्यांनी केला. यामुळे व्यक्तीच्या खासगी जीवन जगण्याच्या अधिकाराचे उल्लंघन झाल्याचेही सरोदे यांनी म्हटले आहे. हे प्रकरण उच्च न्यायालयात गेल्यास पुणे पोलिसांची अडचण वाढण्याची शक्यता त्यांनी व्यक्त केली. पोलिसांनी रचले कारस्थान – असीम सरोदे अॅड. असीम सरोदे यांनी पत्रकार परिषदेत सांगितले की, पुणे पोलिसांनी राजकीय दबावाखाली हे प्रकरण ‘दृश्यम’ चित्रपटाच्या शैलीत रंगवले आहे. ते म्हणाले, “विश्वास नांगरे पाटील यांनी पुणे पोलीस अधीक्षक असताना खऱ्या रेव्ह पार्टीवर कारवाई केली होती. रेव्ह पार्टी म्हणजे मोठ्या आवाजातील संगीत, गर्दी आणि नशेच्या पदार्थांचा समावेश असतो. पण या प्रकरणात सात जण एका घरात दारू आणि बिअर पित होते. घरात दारू पिणे हा गुन्हा नाही. तरीही पोलिसांनी राजकीय हेतूने याला रेव्ह पार्टीचे स्वरूप दिले.” कोकेनचा पुरावा ‘प्लँट’ केल्याचा आरोप – सरोदे यांनी पोलिसांवर थेट आरोप करताना म्हटले, “डॉ. प्रांजल खेवलकर हे एकनाथ खडसे यांचे जावई आहेत. पोलिसांनी दोन ग्रॅम कोकेन सापडल्याचा दावा केला, पण जामीन मिळू नये म्हणून सात मिलिग्रॅम कोकेन जास्त दाखवण्याची व्यवस्था केली. हे पुरावे पोलिसांनीच ‘प्लँट’ केले. राजकीय सूचनांनुसार पोलिसांनी हे कटकारस्थान रचले आणि एक बनावट चित्र उभे केले.” व्हिडीओ व्हायरल करून बदनामी- पोलिसांनी या कारवाईचा व्हिडीओ व्हायरल करून संशयितांना समाजासमोर गुन्हेगार ठरवण्याचा प्रयत्न केल्याचा आरोप सरोदे यांनी केला. ते म्हणाले, “हा व्हिडीओ व्हायरल करणे म्हणजे खासगी जीवनाच्या हक्कांचे गंभीर उल्लंघन आहे. पोलिसांनी कोणताही पंचनामा न करता धाड टाकली आणि कोकेनचा पुरावा ‘प्लँट’ केला. न्यायालयात प्रकरण येण्यापूर्वीच व्हिडीओ व्हायरल करून एकनाथ खडसे यांची बदनामी करण्याचा डाव रचला गेला.” पोलिसांचे राजकीय पोलिसिंग थांबावे- सरोदे यांनी पुढे म्हटले, “पोलिसांचा वापर राजकीय हितासाठी होत आहे. हे राजकीय पोलिसिंग थांबले पाहिजे. या प्रकरणात पोलिसांनी खासगी जीवनाच्या हक्कांचा भंग केला आहे. यामुळे पुणे पोलीस अडचणीत येऊ शकतात.” त्यांनी हे प्रकरण उच्च न्यायालयात जाण्याची शक्यता व्यक्त केली. रोहीणी खडसे रात्री आयुक्तलयात दाखल – दरम्यान, सोमवारी सकाळी रोहिणी खडसे आणि आमदार रोहित पवार पोलिस आयुक्तांची भेट घेणार होते, मात्र अचानक त्यांनी दौरा रद्द केला. त्यानंतर रात्री आठ वाजताच्या सुमारास रोहीणी खडसे पोलिस आयुक्तालयात दाखल झाल्या. सकाळी त्या आणि रोहीत पवार पोलिस आयुक्तांची भेट घेणार होत्या. परंतू रात्री रोहीणी खडसे एकट्याच आयुक्तलयात आल्या. त्यांनी गुन्हे शाखेचे पोलिस उपायुक्त निखील पिंगळे यांची भेट घेतली. भेटी दरम्यान, दोघांत ड्रग पार्टीच्या आरोपावरून त्यांच्या पतीवर दाखल असलेेल्या गुन्ह्याबात चर्चा झाली. रोहीणी खडसे यांनी गुन्ह्याचा तपास पारदर्शक पद्धतीने व्हावा. गोग्य तीच कारवाई व्हावी. कोणावरही अन्याय होता कामा नये, अशी मागणी त्यांनी केल्याचे उपायुक्त पिंगळे यांनी सांगितले. प्रकरणाची पार्श्वभूमी- पुणे पोलिसांनी डॉ. प्रांजल खेवलकर आणि इतर सात जणांना रेव्ह पार्टी प्रकरणात अटक केली. पोलिसांच्या कारवाईवर प्रश्नचिन्ह उपस्थित करत असीम सरोदे यांनी याला राजकीय कारस्थान ठरवले आहे. या प्रकरणाने राजकीय वर्तुळात खळबळ उडवली असून, येत्या काळात याचे पडसाद उच्च न्यायालयात उमटण्याची शक्यता आहे.
