पुणे – प्रोग्रेसिव्ह एज्युकेशन सोसायटीचे शैक्षणिक क्षेत्रात चांगले कार्य असून संस्थेचे रुपांतर लवकरच मॉडर्न विद्यापीठात व्हावे, अशी अपेक्षा सांस्कृतिक कार्य मंत्री सुधीर मुनगंटीवर यांनी व्‍यक्‍त केली. तसेच, माॅडर्न विद्यापीठ स्‍थापन करण्यासाठी राज्‍य शासनाकडून सर्वतोपरी सहकार्य राहील, अशी ग्वाही त्‍यांनी यावेळी दिली.

प्रोग्रेसिव्ह एज्युकेशन सोसायटीतर्फे आयोजित गुरुवर्य शंकररराव कानिटकर पुरस्कार वितरण कार्यक्रमात मुनगंटीवार यांनी दूरदृष्यप्रणालीद्वारे संबोधित केले. यावेळी आमदार सिद्धार्थ शिरोळे, माजी कुलगुरु डॉ. नितीन करमळकर, संस्थेचे कार्याध्यक्ष डॉ.गजानन एकबोटे, पुरस्कार्थी तथा खडकी एज्युकेशन सोसायटीचे अध्यक्ष डॉ.कृष्णकुमार गोयल, राजमाला गोयल, संस्‍थेचे सहकार्यवाह डॉ. जोत्स्ना एकबोटे, कार्यवाह प्रा. शामकांत देशमुख, प्रा.अरविंद पांडे, प्रा. सुरेश तोडकर उपस्थित होते.

जगात आज संपत्तीपेक्षा गुणांना महत्व दिले जात आहे. ज्ञानाला संस्काराची जोड असल्यास विद्यार्थी समाजासाठी ज्ञानाचा उपयोग करतात. शिक्षणाच्या माध्यमातून एकता, शांतता, संस्कृतीला प्रोत्साहन मिळावे यासाठी प्रोग्रेसिव्ह एज्युकेशनच्या माध्यमातून कार्य होत आहेत आणि तसे विद्यार्थी घडत आहेत. आता संस्‍थेने माॅडर्न विद्यापीठ स्‍थापन करण्याच्‍या दृष्टीने पाऊल उचलावीत, असे मुनगंटीवार म्‍हणाले. आमदार शिरोळे यांनी डॉ.गोयल यांचे जीवन कार्य युवा पिढीला प्रेरक असल्‍याचे नमूद केले.

डॉ.गोयल म्हणाले, प्रोग्रेसिव्ह एज्युकेशन सोसायटीतर्फे दिला जाणाऱ्या पुरस्काराच्या निमित्ताने आयुष्यातील मागील घटनांचा मागोवा घेता आला. जिद्दीने परिस्थितीला सामोरे गेल्यास यशाचे शिखर गाठता येते हे यानिमित्ताने पुन्हा एकदा लक्षात आले. विविध क्षेत्रात काम केल्याचे समाधान आहे. डॉ.करमळकर म्हणाले, पुण्यातील शैक्षणिक क्षेत्राला गती देण्याचे काम अनेक संस्था आणि व्यक्तींनी केले.

शिक्षणाच्या माध्यमातून संस्कारपूर्ण व्यक्तिमत्व घडावे. डॉ.गजानन एकबोटे म्हणाले, गुरुवर्य शंकरराव कानिटकर हा पुरस्कार गोयल यांना प्रदान करण्याच्या निमित्ताने चतुरस्त्र व्यक्तिमत्वाचा सत्कार होत आहे. प्रास्ताविक शामकांत देशमुख यांनी केले. उद्योजक डॉ.कृष्णकुमार गोयल यांनी पुण्याच्या सामाजिक, सांस्कृतिक क्षेत्रात चांगुलपणा वाढविण्याचे कार्य केले आहे. त्यांना गुरूवर्य शंकरराव कानिटकर पुरस्कार प्रदान करणे त्यांच्या या कार्याचा हा सन्मान आहे. ते खऱ्या अर्थाने पुण्याचे कोहिनूर आहेत, असे गौरवोद्‌गार सुधीर मुनगंटीवर यांनी काढले.