पुणे – मार्केट यार्डातील व्यापाऱ्यांचे प्रश्न केंद्र आणि राज्य शासनाच्या पातळीवर सोडविण्यासाठी नेहमीच पुढाकार घेतला असून, भविष्यातही व्यापाऱ्यांचे रखडलेले प्रश्न कायम स्वरूपीमार्गी लावण्यावर आपला भर राहणार असल्याचे आश्वासन पर्वती विधानसभा मतदारसंघातील भाजप महायुतीच्या उमेदवार माधुरी मिसाळ यांनी व्यापारी, तसेच व्यावसायिकांना दिले. जनभावनेचा आदर करून मार्केट यार्डातील वाहनतळावरील प्रस्तावित फिश मार्केटच्या प्रस्तावाला सरकारकडून स्थगिती मिळविल्याचे समाधान असल्याचेही त्या म्हणाल्या.

मिसाळ यांच्या प्रचारार्थ मार्केट यार्ड परिसर, शंकर महाराज महाराज वसाहत, चव्हाणनगर, पद्मावतीनगर, तीन हत्ती चौक, विणकर सोसायटी परिसरात प्रचारफेरीचे आयोजन करण्यात आले होते. या वेळी त्या बोलत होत्या. माजी नगरसेवक राजेंद्र शिळिमकर, महेश वाबळे, विनय ठाकूर, हरीश परदेशी, रवींद्र चव्हाण, कैलास मोरे, बापू भोसले, श्रीकांत पुजारी, अनिल जाधव, सुशांत ढमढेरे, श्रुती नाझीरकर, अमोल पोद्दार, भरत गायकवाड, उद्धव कांबळे, प्रतीक कोंडे, संध्या नांदे, प्रशांत दिवेकर, योगेश वाबळे यांची प्रमुख उपस्थिती होती.

मिसाळ म्हणाल्या, की दि पूना मर्चंट चेंबर, जैन समाज, व्यापारी आणि स्थानिक नागरिकांचा फिश मार्केटला विरोध होता. त्यानुसार प्रस्तावाला स्थगिती मिळविली. व्यापाऱ्यांच्या प्रश्नांवर उपमुख्यमंत्री देवेंद्र फडणवीस यांच्याबरोबर सकारात्मक बैठकीसाठी पुढाकार घेतला. त्यामुळे राज्यभरातील व्यापारी संघटनांच्या संपाला स्थगिती देण्यात आली. पणनविषयक तांत्रिक आणि कायदेशीर सुधारणांसाठी समिती स्थापन करण्याचा या बैठकीत निर्णय करण्यात आला.

जीएसटीच्या सर्व विषयांवर जीएसटी कौन्सिलच्या बैठकीत चर्चेसाठी पाठपुरावा केला. नगरविकास संदर्भातील विषयांसाठी बैठक घेण्यासाठी पुढाकार घेतला. शिवनेरी रस्त्यावरील अतिक्रमण रोखण्यासाठी सुरक्षा रक्षकांच्या नियुक्त्या केल्याने अतिक्रमणांना आळा बसला असल्याचेही त्यांनी स्पष्ट केले.