हडपसर : हडपसर- स्वारगेट बीआरटी मार्गात मगरपट्टा चौक ते काळूबाई मंदिर चौक दरम्यान पीएमपीएलचे पाच ते सहा बस स्टॉप आहेत. येथे प्रवाशांना थांबण्यासाठी शेड आहेत.मात्र, शेड मध्ये मद्यपी, भिक्षेकरी व बेघर असलेल्यांचा वावर वाढला आहे. त्यामुळे प्रवाशांना या बस स्टॉपमध्ये बसने किंवा उभे राहणे नकोसे झाले आहे. या त्रासातून प्रवाशी मुक्त कधी होणार, असा प्रश्न बसने नियमित प्रवास करणाऱ्या प्रवाशांना पडला आहे.

गेली अनेक वर्षांपासून हडपसर- स्वारगेट बीआरटी मार्ग अर्धवट स्थितीत आहे.बस धावण्यासाठी एकसारखी मार्गिका नाही. त्यातच रस्त्याच्या मध्ये असलेल्या बस थांब्याची मोठी दुरवस्था झाली आहे. मगरपट्टा चौक, वैदूवाडी चौक, रामटेकडी उड्डाणपूल, काळूबाई मंदिर चौक याठिकाणी बस स्टॉप असून येथे बीआरटी उपक्रमातील प्रवाशी वेटिंग शेड आहेत. मात्र, सध्या या थांब्यात घाणीचे साम्राज्य पसरले आहे.

बस थांब्यात मद्यपी, भिक्षेकरी व बेघर यांचा वावर आहे.अनेकदा मद्यपान करून मद्यपी येथे झोपलेले असतात. याशिवाय काही भिक्षेकरी यांनी या बस थांब्याला कायमस्वरूपी घरच केले आहे. खराब अवस्थेतील अंथरून- पांघरून,जुने कपडे, पाण्याच्या बॉटल, शिळे- कुजलेले अन्न याठिकाणी पडलेले असते.त्यामुळे बस थांब्याबर दुर्गंधी पसरलेली असते. अनेकदा दोन-तीन भिक्षेकरी, मद्यपी या थांब्यावर बसलेले किंवा झोपलेले असतात. अशावेळी बसची वाट पाहत असणाऱ्या प्रवाशांना जीव मुठीत धरून रस्त्यावरच उभे राहून बसची वाट पाहवी लागत आहे.

महिला व विद्यार्थीनी प्रवाशांची मोठी कुचंबना व गैरसोय होत आहे.पीएमपीएल मार्ग, बस थांबे यांच्या सुशोभिकरणावर महापालिका कोट्यवधी रुपये खर्च करते. मात्र, पुन्हा काही महिन्यातच या सुशोभीकरणाची वाटचाल बकालीकरणाकडे सुरू झालेली असते. त्यामुळे पालिका हे कोट्यवधी रुपये नेमके कशासाठी खर्च करते, असा प्रश्न प्रवाशांना पडला आहे.

एक – दोन बस थांब्याचा ताबा मद्यपी भिक्षेकरी, बेघरांनी घेतला आहे. या सर्वच बस स्टॉपच्या परिसरात अत्यंत उग्र वास असतो. त्याकडेही पालिकेने लक्ष दिलेले नाही. त्यामुळे महापालिका व पीएमपीएल प्रशासन यांनी यात तातडीने लक्ष घालावे व हे बस स्टॉप सुस्थितीत करावे ,अशी मागणी केली जात आहे.

केवळ जाहीराती साठीच बस स्टॉप
बसची वाट पाहत असणाऱ्या बस प्रवाशांना थांबण्याची व बसण्याची व्यवस्था म्हणून उभारण्यात आलेले हे बस स्टॉप सध्या प्रवाशांना उपयोगी पडत नाहीत. मात्र, थांब्यावर जाहिरातीचे फलक लावण्यासाठी त्याचा चांगलाच उपयोग होतो आहे. व्यावसायिक जाहिराती बरोबरच राजकीय नेतेमंडळी यांचे फ्लेक्सही या थांब्यावर झळकत असतात. परंतु, प्रवाशांना खरंच येथे सोयी सुविधा उपलब्ध आहेत का याकडे सर्वांचे दुर्लक्ष होत आहे.