प्रभात वृत्तसेवा लोणी काळभोर – 31 डिसेंबर व नववर्षाच्या पार्श्वभूमीवर परवानाधारक दारू विक्रेत्यांनी शासनाने ठरवून दिलेले सर्व नियम काटेकोरपणे पाळावेत. दारू विक्रीदरम्यान कोणत्याही प्रकारचा नियमभंग आढळून आल्यास संबंधितांवर कडक कायदेशीर कारवाई करण्यात येईल, असा स्पष्ट इशारा लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी दिला. 31 डिसेंबर व नववर्ष साजरे करण्याच्या पार्श्वभूमीवर लोणी काळभोर पोलीस ठाण्याच्या हद्दीतील लॉज व्यावसायिक, वाईन शॉप, बिअर शॉप, हॉटेल, रेस्टॉरंट व बारचे चालक व मालक यांची पोलीस ठाण्यात बैठक आयोजित करण्यात आली होती. या बैठकीत ते बोलत होते. यावेळी पोलीस निरीक्षक (गुन्हे) स्मिता पाटील, पोलीस हवालदार रवी आहेर तसेच संबंधित व्यावसायिक मोठ्या संख्येने उपस्थित होते. यावेळी मार्गदर्शन करताना पोलीस निरीक्षक पन्हाळे म्हणाले की, हॉटेलमधील सर्व कामगारांचे पोलीस व्हेरिफिकेशन करून घ्यावे. दारू पिण्याचा परवाना असलेल्या ग्राहकांनाच दारू विक्री करावी. 18 वर्षांखालील मुलांना दारू देणे पूर्णतः प्रतिबंधित आहे. ग्राहकांशी बिलावरून वाद घालू नयेत. हॉटेल व बारमध्ये स्वयंसेवकांची नेमणूक करावी. हॉटेलबाहेर व आजूबाजूचा रस्ता कव्हर होईल अशा पद्धतीने सीसीटीव्ही कॅमेरे बसवावेत. ग्राहकांना अनावश्यक वेळ थांबवू नये तसेच नेमून दिलेल्या वेळेनंतर हॉटेल सुरू ठेवू नये, याची खबरदारी घ्यावी. ध्वनीक्षेपक वापराबाबत सर्वोच्च न्यायालयाने घालून दिलेल्या नियमांचे काटेकोर पालन करावे, असेही त्यांनी स्पष्ट केले.महिलांच्या सुरक्षिततेसाठी महिला सुरक्षा रक्षकांची नेमणूक करावी. कोणतीही संशयास्पद व्यक्ती किंवा अनुचित प्रकार आढळल्यास तात्काळ पोलीस ठाण्यात संपर्क साधावा. आपत्कालीन परिस्थितीत 112 क्रमांकावर तत्काळ कॉल करण्याचे आवाहनही त्यांनी केले. तसेच हॉटेलमध्ये आग प्रतिबंधक उपकरणे सुस्थितीत ठेवावीत, सुरक्षा ऑडिट करून घ्यावे, अशा सूचनाही यावेळी देण्यात आल्या. नियमांचे पालन केल्यासच सुरक्षित व शांततामय नववर्ष साजरे होईल, असे पोलीस निरीक्षक पन्हाळे यांनी शेवटी नमूद केले.
