Pune Police : पुणे शहर पोलीस दलाच्या वाहतूक शाखेत कार्यरत असलेल्या पोलीस कॉन्स्टेबलला तेलंगणा पोलिसांनी १२ किलो गांजासह अटक केली आहे. नितीन ज्ञानू शिंदे असे अटक करण्यात आलेल्या कॉन्स्टेबलचे नाव आहे. तो गेल्या दीड वर्षापासून विश्रामबाग वाहतूक विभागात कार्यरत होता.

या घटनेची माहिती मिळताच पुण्याचे पोलीस आयुक्त अमितेश कुमार यांनी त्याला तात्काळ प्रभावाने निलंबित केले असून, सेवेतून बडतर्फ करण्याचीही तयारी सुरू असल्याची माहिती आहे.

पोलिसांनी दिलेल्या माहितीनुसार, नितीन शिंदे हा ओडिशा येथे गेला होता. तेथून १२ किलो गांजा घेऊन तो तेलंगणाच्या दिशेने जात होता. दरम्यान, तेलंगणातील वारंगल जिल्ह्यातील नेक्कोंडा परिसरात एका व्यक्तीकडे मोठ्या प्रमाणात गांजा असल्याची माहिती पोलिसांना मिळाली. त्यानुसार पोलिसांनी बसथांब्यावर संशयास्पदरीत्या थांबलेल्या शिंदे याला पकडून त्याच्या बॅगेची तपासणी केली. या तपासणीत १२ किलो गांजा आढळून आला.

चौकशीदरम्यान अटक करण्यात आलेला व्यक्ती पुणे शहर पोलीस दलात कॉन्स्टेबल म्हणून कार्यरत असल्याचे उघड झाले. याप्रकरणी वारंगल जिल्ह्यातील नेक्कोंडा पोलीस ठाण्यात अमली पदार्थ प्रतिबंधक कायद्यानुसार (एनडीपीएस) गुन्हा दाखल करण्यात आला आहे.

पोलीस दलातील कर्मचाऱ्यालाच अमली पदार्थांच्या प्रकरणात अटक झाल्याने खळबळ उडाली आहे. या घटनेची गंभीर दखल घेत पुणे पोलीस आयुक्तांनी निलंबनाची कारवाई केली आहे. तसेच त्याला पोलीस सेवेतून बडतर्फ करण्याच्या दृष्टीनेही पुढील कार्यवाही केली जात असल्याचे समजते.